• მოსახლეობამ ჯოყოლო–დუმასტურის ხიდთან მისასვლელი გზა რამდენჯერმე გადაკეტა

    ორშაბათი, 16 ოქტომბერი 2017 22:45 view 3764
    მოსახლეობამ ჯოყოლო–დუმასტურის ხიდთან მისასვლელი გზა რამდენჯერმე გადაკეტა

    პანკისის ხეობაში სოფელ ჯოყოლოს მცხოვრებლებმა ჯოყოლო–დუმასტურის ხიდთან მისასვლელი გზა პროტესტის ნიშნად რამდენჯერმე გადაკეტეს. მდინარე ალაზანზე ხიდის მშენებლობა 2016 წლის ოქტომბერში დასრულდა, თუმცა ხიდამდე მისასვლელ გრუნტის ვიწრო გზაზე, მშრალ და მზიან ამინდებში ტრანსპორტის მოძრაობის გამო ისეთი მტვერია, რომ ადგილობრივებს საცხოვრებელი სახლების ეზოებსა და საკარმიდამო ნაკვეთებში გასვლაც უჭირთ. მოსახლეობა გზის მოასფალტებას ითხოვს.

    „ყოველდღიურად 500-მდე მანქანა მოძრაობს და მტვერი სახლებში შემოდის, ფანჯარასაც ვეღარ ვხსნით, გარეთ ვეღარ გამოვდივართ. წვიმიან ამინდებში გზაზე ვერ გაივლი, გუბეებით არის სავსე. რამდენჯერმე მივმართეთ გამგეობას, მოვალთ, გავაკეთებთო, მაგრამ არანაირი შედეგი არ არის. გზა რამდენჯერმე გადავკეტეთ. გადაგვკიდეს ერთმანეთს ალაზნის გაღმა მდებარე სოფლების მცხოვრებლებს. ან ხიდს ჩავკეტავთ, ან რაღაც ზომებს უნდა მივმართოთ, სხვანაირად აქ ცხოვრება ძალიან გართულდა“, - ამბობს ჯოყოლოში მცხოვრები ზაურ მუთოშვილი.

    „სარეცხი ვერ გაგვიფენია, ბავშვები გარეთ ვერ გამოგვიყვანია, რადგან მტვერია. გზა გადავკეტეთ, რადგან არ შეიძლებოდა გარეთ გამოსვლა, მტვრის ისეთი ბუღი იდგა. სხვა სოფლებიდან აჯანყდნენ, რატომ გადაკეტეთო. იმიტომ გადავკეტეთ, რომ ხელისუფლებისგან ვითხოვდით, რადგან ვიწრო შიდა საუბნო გზა ცენტრალურ გზად აქციეს, ასფალტი მაინც დაეგოთ. პოლიცია მოვიდა და გზა გაგვახსნევინეს. ახლაც იმავეს ვითხოვთ, თუ არადა იმ გზას საერთოდ გადავკეტავთ. თუ არ გააკეთებენ, არ გავხსნით, ჩაგვყარონ ციხეში“, - აღნიშნა თენგიზ დაქიშვილმა.

    ჯოყოლოს მცხოვრებლებს გზის მოასფალტებას ადგილობრივი თვითმმართველობის არჩევნებამდე დაპირდნენ, თუმცა სამუშაოები ჯერ დაწყებული არ არის. „იმედი გვქონდა, რომ არჩევნებამდე გააკეთებდნენ, მაგრამ თუ არ გააკეთეს „ქართული ოცნება“ ჩვენგან ხმას ვერ მიიღებს. არჩევნებამდე დაველოდებით, შემდეგ კი გზას ისევ გადავკეტავთ“, - ამბობს გივი დაქიშვილი.

    ჯოყოლო-დუმასტურის ხიდთან, ასევე ბირკიანის და ჯოყოლოს სკოლებთან მისასვლელი გზების მოასფალტებისთვის მუნიციპალური განვითარების ფონდმა ტენდერი 2017 წლის 24 აპრილს გამოაცხადა. ტენდერში კონპანია „გზამშენ გრუპმა“ გაიმარჯვა. ბიუჯეტიდან სამუშაოებითვის საერთო ჯამში 260 ათასამდე ლარი გამოიყო.

    „გზამშენ გრუპის“ დირექტორმა, ბაჩანა ცეკვავამ პანკისის სათემო რადიოსთან საუბარში აღნიშნა, რომ გზების რეაბილიტაცია უამინდობის გამო გაჭიანურდა. მისივე თქმით, სამუშაოები, რომელიც დღეს დაიწყო, ოქტომბრის ბოლომდე დასრულდება.

    რადიო WAY

    რადიო WAY

    პანკისის სათემო რადიო WAY – მაუწყებლობს პანკისის ხეობაში სიხშირეზე FM 101.1. სათემო რადიო არასამთავრობო ორგანიზაცია „სამოქალაქო აქტივობების ცენტრმა“ დააფუძნა.

    სიახლეები

    ხვრელების არსებობა რუსეთს ომის გახანგრძლივებაში ეხმარება - ინტერვიუ აშშ-ის ელჩთან

    „სახიფათო ნაბიჯია ურთიერთობების ნორმალიზების მცდელობა იმ ქვეყანასთან, რომელსაც არასოდეს შეუსრულებია…

    ბაზისბანკის მხარდაჭერით, აჭარა აგროჯგუფმა ლურჯი მოცვის ბაღები გააშენა

    ბაზისბანკი, როგორც ბიზნესის ერთ-ერთი უმსხვილესი დამფინანსებელი, აგრძელებს ადგილობრივი ბიზნესის განვითარების…

    ვიბრძოლებთ, რომ საქმე გამოძიებას დაუბრუნდეს - მაჩალიკაშვილი სტრასბურგის გადაწყვეტილებაზე

    „გადაწყვეტილებით ძალიან აღფრთოვანებული თუ არა, კმაყოფილი ვარ, რადგან ის ამბობს,…
  • საგრანტო კონკურსები

    კონტაქტი

    • საქართველო, ახმეტა, პანკისი, დუისი.
    • 0 353 22 22 11
    • [email protected]