დოღში გამარჯვებულებს ფულადი და სხვა სახის საჩუქრები გადაეცემათ. პირველ ადგილზე გასული მხედარი 500 ლარს და ცხვარს მიიღებს. მეორე ადგილის მფლობელი 250 ლარით, ხოლო მესამე ადგილის მფლობელი 150 ლარით დაჯილდოვდება. 50 ლარით დასაჩუქრდებიან დოღის დანარჩენი მონაწილეები.

19 წლის თემირლან მაჩალიკაშვილი, პანკისის ხეობაში 2017 წლის 26 დეკემბერს ჩატარებული სპეცოპერაციის დროს სპეცრაზმმა სასიკვდილოდ დაჭრა. თემირლანი 10 იანვარს გარდაიცვალა. პროკურატურა თემირლან მაჩალიკაშვილის სასიკვდილოდ დაჭრის ფაქტზე გამოძიებას სისხლის სამართლის კოდექსის 333-ე მუხლის მე-3 ნაწილით აწარმოებს, რაც ძალადობით სამსახურებრივი უფლებამოსილების შესაძლო გადამეტებას გულისხმობს. გამოძიებას პასუხისგებაში ამ დრომდე არავინ მიუცია.

თემირლან მაჩალიკაშვილს და სპეცოპერაციის შედეგად პანკისში დაკავებულ სხვა პირებს სახელმწიფო უსაფრთხოების სამსახური ტერორიზმის ხელშეწყობაში, კერძოდ, ახმედ ჩატაევის და მისი ჯგუფის დახმარებაში ადანაშაულებდა. სუს-ს თემირლან მაჩალიკაშვილისთვის ბრალი არ წაუყენებია და ამ დრომდე, მის მიერ დანაშაულის ჩადენის უტყუარი მტკიცებულებებიც არ გაუსაჯაროებია, ასეთის არსებობის შემთხვევაში. დანარჩენი 5 პირი დაპატიმრებულია. მათ ბრალი ტერორიზმის ხელშეწყობაში ედებათ. საქმეს თბილისის საქალაქო სასამართლო დახურულ სხდომებზე იხილავს.

თემირლან მაჩალიკაშვილის უდანაშაულობის პრეზუმფციის დარღვევის გამო, მისმა მშობლებმა, სუს-ის წინააღმდეგ, მორალური ზიანის ანაზღაურების მოთხოვნით, რამდენიმე დღის წინ სასამართლოს მიმართეს.

ამასთან, თემირლანის მშობლები და პანკისის მცხოვრებლები მაჩალიკაშვილის ოჯახისთვის დაზარალებულის სტატუსის მინიჭებას, თემირლან მაჩალიკაშვილის უდანაშაულოდ აღიარებასა და თემირლან მაჩალიკაშვილის მკვლელობის საქმეზე დამნაშავეთა დასჯას ითხოვენ. ამ მოთხოვნებით პანკისში რამდენიმე საპროტესტო აქცია გაიმართა.