სპეციალისტების მტკიცებით, შემოწმების შედეგად აღმოჩნდა, რომ ჰაერში მტვრის, აზოტის დიოქსიდისა და ნახშიროჟანგის კონცენტრაციები დასაშვებ ნორმაზე ბევრად დაბალია და მოსახლეობა უსაფრთხო გარემოში ცხოვრობს.

„ასევე გაიზომა ელექტრომაგნიტური ველის ენერგიის ნაკადის სიმკვრივე. მობილური კავშირგაბმულობის ანძების შედეგად გამოწვეულ გამოსხივებაზეა საუბარი. მაღალი ძაბვის გადამცემ ხაზებთან კი გავზომეთ ელექტრული ველის დაძაბულობა. ელექტრომაგნიტური ველის დასაშვები ნორმა არის 10 მიკროვატი, შემოწმების შედეგად აღმოჩნდა 3. რაც შეეხება მაღალი ძაბვის ხაზებთან ელექტრული ველის დაძაბულობას, ამას ნორმატიული ზღვარი არ აქვს. უფრო სანიტარული ნორმებია, რომ მოსახლეობიდან რა მანძილით უნდა იყოს ეს ხაზები დაშორებული. რომ გავზომეთ იყო 30 ვოლტის ფარგლებში, რაც ნამდვილად დაბალია“, – უთხრა პანკისის სათემო რადიო WAY–ს გარემოზე ტექნოგენური ზემოქმედების შეფასებისა და საექსპედიციო მომსახურების სამმართველოს უფროსმა ლევან პაპაჩაშვილმა.

სპეციალისტებმა მდინარე ალაზნიდან წყლის სინჯებიც აიღეს წყლის ხარისხის შესამოწმებლად. კვლევის პასუხები რამდენიმე დღეში გახდება ცნობილი.

გარემოს ეროვნული სააგენტოს სპეციალისტებმა ექსპრესლაბორატორიის მუშაობა პანკისელ ახალგაზრდებსაც გააცნეს. მანამდე ახალგაზრდებს პანკისის სათემო რადიოს ოფისში გარემოსა და ბუნებრივი რესურსების დაცვის მინისტრი გიგლა აგულაშვილი შეხვდა და სამინისტროში მიმდინარე პროექტებზე ესაუბრა.

ამასთან, სოფელ დუისში გამწვანების აქციაც გაიმართა. აქციის ფარგლებში წიწვოვანი (შავი ფიჭვი) და ფოთლოვანი სახეობის ნერგები დაირგო.

პროექტს ახორციელებს „სამოქალაქო აქტივობების ცენტრი“ PH International-ის GE CALLS-ის პროგრამის ფარგლებში, აშშ-ის სახელმწიფო დეპარტამენტის ანტინარკოტიკული და სამართალდამცავ ორგანოებთან თანამშრომლობის საერთაშორისო ბიუროს (INL) ფინანსური მხარდაჭერით.