„მინდა კიდევ ერთხელ გაგახსენოთ წინა ხელისუფლების ძალიან დიდი დანაშაული, რაც ახმეტელების მიმართ ჩაიდინეს. ხე-ტყის მრეწველობა ახმეტისთვის ყოველთვის ტრადიციული დარგი იყო და უამრავი ადამიანი იყო ამ მიმართულებით დასაქმებული. როდესაც გაყიდეს გრძელვადიანი ლიცენზია, ფაქტობრივად, ამ რესურსზე აღარ აქვთ წვდომა ახმეტელებს. რა ხდება დღეს? ეს რესურსი იჭრება, მორის სახით გადის დასავლეთ საქართველოში, იქ იხერხება და იყიდება უცხოეთში, იმის ნაცვლად, რომ აქ ადგილზე ამუშავებულიყო წარმოება, ადგილზე დასაქმებულიყო ხალხი. თან ამ დარგის ბევრი სპეციალისტი ცხოვრობს ახმეტაში. მათ ეს სიკეთე არ ადგებათ“, - განაცხადა ამომრჩევლებთან შეხვედრაზე სამხარაულმა.

მისივე თქმით, ხელისუფლება ამ პრობლემის მოგვარებაზე მუშაობს და სახელმწიფოს ჩარევის შემდეგ, ხე-ტყის რესურსი მოსახლეობისთვის ისევ ხელმისაწვდომი გახდება. სამხარაულის განმარტებით, ამ საკითხზე პრემიერ-მინისტრთან შეთანხმებით, გარემოს დაცვის სამინისტროსთან ერთად მუშაობენ.

კახეთის საინფორმაციო ცენტრთან საუბრისას გელა სამხარაულმა ინიციატივის შესახებ განმარტა და განაცხადა, რომ ხე-ტყის მოჭრას, ტყიდან გამოტანას და რეალიზაციას სახელმწიფო უნდა ახდენდეს.

„გარემოს დაცვის სამინისტროს მე ვთავაზობ ასეთ ვარიანტს, რომ არა კერძო კომპანიებმა, ვისზეც გაიცემა ლიცენზია და მერე მხოლოდ თვითონ არის მომპოვებელი, არამედ სახელმწიფომ თვითონ გამოიტანოს ის რესურსი, რისი მოჭრაც არის შესაძლებელი. შეიქმნას სპეციალური ადგილები, სადაც მოხდება ამ რესურსის განთავსება და იქიდან მოხდეს რეალიზაცია. ეს უკვე ხელმისაწვდომი იქნება აბსოლუტურად ყველასთვის, ვინც იქნება მსურველი, რომ იქიდან იყიდოს და არა ის, რომ ერთმა კომპანიამ, დავუშვათ, მოიპოვა ლიცენზია, გამოაქვს ეს მასალა. მერე, როდესაც კომპანია თვითონ არის გადამამუშავებელი, შესაბამისად, სხვა უკვე კონკურენციას ვერ გაუწევს იმიტომ, რომ ნედლეულის თუ თვითონ მიყიდის და თან, ამავე დროს, თვითონაც ანალოგიურ პროდუქციას დაამზადებს, კონკურენციას სხვა კომპანია უკვე ვერ გაუწევს. მე ვფიქრობ, რომ არა მხოლოდ ხე-ტყეზე, არამედ, სხვა რესურსზეც უნდა დავიწყოთ ამაზე საუბარი. მაგალითად, არის კარიერები, რომ სახელმწიფომ გააკეთოს გარკვეული ინვესტირება და ეს მასალა ხელმისაწვდომი გახადოს ყველა დაინტერესებული პირისთვის“,- აღნიშნა გელა სამხარაულმა. მისივე განმარტებით, ასეთი პრაქტიკა გერმანიასა და ავსტრიაში უკვე არსებობს.

ახმეტაში ხე-ტყის მოპოვებაზე გრძელვადიანი ლიცენზია 20 წლიანი ხელშეკრულებით 2008 წელს გაიცა. ლიცენზიანტია შპს „ჯორჯია ვუდ ენდ ინდუსტრიალ დეველოფმენთ კო“, რომელიც ჩინური კომპანიის, „ხე-ტყის სამრეწველო საზოგადოება ხუაშუნ“-ის შვილობილი კომპანიაა. „ჯორჯიან ვუდის“ საქმიანობის სფერო ხე-ტყის დამზადება და ხის პროდუქციით ვაჭრობაა.