ფილმს ქალაქ ახმეტაში, 1-ელ საჯარო სკოლაში, 12:00 საათზე უჩვენებენ. პანკისის ხეობაში კი ღონისძიება სოფელ დუისის კულტურის სახლში, 15:00 საათზე დაიწყება. ჩვენებას დაესწრებიან ჯოყოლოს, ბირკიანის, დუმასტურის, ყვარელწყალისა და საკობიანოს სკოლების კინოკლუბების წევრები და პედაგოგები. ჩვენების შემდეგ გაიმართება დისკუსია. პანკისში ფილმის ჩვენების მხარდამჭერი კახეთის რეგიონული განვითარების ფონდია. 

არაერთი საერთაშორისო ჯილდოს მფლობელი ფილმი „გაღმა ნაპირი“ 2009 წელს გამოვიდა. ის ასახავს 12 წლის დევნილი ბიჭის თავგადასავალს, რომელიც თბილისიდან აფხაზეთში მამის საძებნელად მიდის. 2009 წელს ფილმი ოცდაათამდე ქვეყანაში, ოთხმოცამდე საერთაშორისო კინოფესტივალზე აჩვენეს.

პროექტი „კინო სკოლაში“, ეროვნული კინოცენტრის ინიციატივით, 2014 წლიდან ხორციელდება და ითვალისწინებს საქართველოს რეგიონების სკოლებში ქართული და უცხოური კინოკლასიკის, ასევე თანამედროვე ფილმების რეგულარული ჩვენება-დისკუსიების ჩატარებას. პროექტი მიზნად ისახავს მოზარდებში კრიტიკული აზროვნების და შემოქმედებითი უნარების განვითარებას. ამჟამად პროექტში 217 სკოლაა ჩართული, მათ შორის 5 პანკისის ხეობიდან.