• weather cur horoscope

    ონლაინ სწავლების გამოწვევები – რა შეცვალა კოვიდ-19-მა ჯოყოლოს სკოლაში

    სამშაბათი, 27 ოქტომბერი 2020 15:19 view 836
    ონლაინ სწავლების გამოწვევები – რა შეცვალა კოვიდ-19-მა ჯოყოლოს სკოლაში

    ახმეტის მუნიციპალიტეტის სოფელ ჯოყოლოს საჯარო სკოლაში, სადაც 146 მოსწავლე სწავლობს, გაკვეთილები სხვადასხვა დროს იწყება და სრულდება. კოვიდ-19-მა შეცვალა ამ სკოლის არა მხოლოდ სასწავლო პროცესი, არამედ ზეგავლენა იქონია განათლების ხარისხსა და მოსწავლეებს შორის ურთიერთობებზე.

    ჯოყოლოს საჯარო სკოლაში I-V კლასელები სწავლას დილის 9 საათზე იწყებენ, უფროსკლასელები კი ოდნავ მოგვიანებით. კოვიდ-19-ის რეგულაციების გამო, ბავშვები დეზობარიერის გავლით შენობაში შესვლისას გადიან თერმოსქრინინგს, საკლასო ოთახებში დაცულია ერთმეტრიანი დისტანცია და შესვენებებზეც კი მანდატური და მასწავლებლები ბავშვებს ერთმანეთთან მიახლოების საშუალებას არ აძლევენ. საბედნიეროდ, სკოლაში ინფექციის ერთი შემთხვევაც არ დაფიქსირებულა.

    ოქტომბრიდან, პირისპირ სწავლის დაწყებამდე, მასწავლებლებმა განათლების სამინისტროდან მიიღეს წერილობითი და ვიდეო რეკომენდაციები სწავლის პროცესის უსაფრთხოდ წარმართვასთან დაკავშირებით. ამჟამად, პედაგოგები დისტანციური სწავლების ავკარგიანობას აფასებენ და იმ გამოწვევებს იხსენებენ, რომლის წინაშეც მსოფლიო პანდემიის გამო, სკოლა აღმოჩნდა.

    „ვერავის და ვერც საკუთარ თავს მოვატყუებთ, რომ დისტანციური სწავლებისთვის მზად ვიყავით და ეს იყო ხარისხიანი სწავლა.

    განსაკუთრებით პრობლემური იყო დისტანციური სწავლება მრავალშვილიანი ოჯახებისთვის, ყველას არ ჰქონდა ტექნიკასთან წვდომა. კომპიუტერი ისედაც იშვიათია ოჯახში. პედაგოგების ნაწილმა იცოდა კომპიუტერის გამოყენება, ზოგიერთ პედაგოგს კი სახლში დარჩენილი სტუდენტი შვილები ეხმარებოდნენ.

    კოვიდის ფარგლებში ვისწავლეთ ყველაზე უმთავრესი – დავიცავთ საკუთარი თავი და დავიცვათ სხვისი უსაფრთხოება და ჯანმრთელობაც. ახლა უფრო მობილიზებულები ვართ“, – ამბობს ნაზი ბორჩაშვილი, ჯოყოლოს სკოლის დირექტორი.

    მაკა წინწალაშვილი ინგლისური ენის პედაგოგია. მისი ორივე შვილი სკოლის მოსწავლეა. დისტანციური სწავლების პერიოდში მათთვის ერთ-ერთი მთავარი სირთულე იყო ის, რომ ოჯახში მხოლოდ ერთი კომპიუტერი ჰქონდათ.

    „უამრავ სირთულესთან არის დაკავშირებული დისტანციური სწავლება. ორი შვილი მყავს და სახლში მხოლოდ ერთი კომპიუტერი გვაქვს. ბავშვებს უწევდათ ოჯახის წევრების ტელეფონების გამოყენება. განსაკუთრებით პრობლემური იყო დემოტივირებულ მოსწავლეებთან მუშაობა. მოტივირებული მოსწავლეები შეძლებისდაგვარად ერთვებოდნენ სასწავლო პროცესში. სამინისტრომ შემოგვთავაზა თიმსის პლათფორმა, თუმცა ყველა პედაგოგი ვერ იყენებდა იმ რესურსს, რაც ამ პლათფორმაზე არსებობდა“, – ამბობს პედაგოგი.

    ჯოყოლოს სკოლის მეთორმეტეკლასელებისთვის ონლაინ სწავლებისას ყველაზე რთული კომუნიკაცია, ინტერნეტის ხარისხი და დისციპლინა იყო, რომლის გაკონტროლება ონლაინ ძალიან რთულია. მარდია დუიშვილი, ანზორ ცისკარიშვილი, მარდია აჭიშვილი და ბილაალ დუიშვილი, ყველანი ერთად მიიჩნევენ, რომ კოვიდ-19-მა ყველაზე დიდი გავლენა მათ ურთიერთობებზე მოახდინა. 

    „პლათფორმა „თიმსი“ საკმაოდ მაღალი სიჩქარის ინტერნეტს საჭიროებს და რაც ხეობაში პრობლემაა. გაკვეთილების დროს ხმა იჭედებოდა, არ გვესმოდა. მაგალითად, მათემატიკის გაკვეთილზე ერთი რამ რომ ვერ გაიგო, უკვე შეცდომას უშვებ და შემდეგ, შენ შეიძლება სხვა შეიყვანო შეცდომაში“, – ამბობს ბილაალ დუიშვილი.

    მარდია დუიშვილის თქმით, ხეობაში მცხოვრები ყველა ოჯახი არ არის ინტერნეტით უზრუნველყოფილი და ყველას არ ჰქონდა ონლაინ გაკვეთილებზე დასწრების შესაძლებლობა.

    „რაც იმ დროს უნდა გვესწავლა,
    წელს ისევ ახლიდან მოგვიწია იმ პროგრამის გავლა.

    ცელქი ბავშვები, მასწავლებელს ხან ხმას უთიშავდნენ, რაღაცეებს აკეთებდნენ და ამიტომაც ხშირად გვიცდებოდა ხოლმე გაკვეთილები და ეს იყო ცუდი“, – აღნიშნავს ანზორ ცისკარიშვილი.

    ჯოყოლოს საჯარო სკოლა 28 ოქტომბრიდან რამდენიმე დღე ისევ ონლაინ სწავლებაზე გადავა. განათლების სამინისტროს გადაწყვეტილებით, იმ სკოლებში სადაც 31 ოქტომბრის საპარლამენტო არჩევნებისთვის საარჩევნო უბნები გაიხსნება, 3 დღე დისტანციურად იმუშავებენ.

    რადიო WAY

    რადიო WAY

    პანკისის სათემო რადიო WAY – მაუწყებლობს პანკისის ხეობაში სიხშირეზე FM 101.1. სათემო რადიო არასამთავრობო ორგანიზაცია „სამოქალაქო აქტივობების ცენტრმა“ დააფუძნა.

    სიახლეები

    პანკისის ხეობის ექვსივე საარჩევნო უბანზე ირაკლი ქადაგიშვილმა გაიმარჯვა

    პანკისის ხეობაში, საპარლამენტო არჩევნების მეორე ტურში, „ქართული ოცნების“ კანდიდატმა ირაკლი…

    პანკისის ხეობაში ამომრჩეველთა აქტივობა პირველ ტურთან შედარებით დაბალია

    საპარლამენტო არჩევნების მეორე ტურში, 18:00 საათისთვის, ამომრჩეველთა აქტივობა - 28.89%-ია,…

    პანკისის ხეობაში ამომრჩეველთა აქტივობა 20.9%-ია

    საპარლამენტო არჩევნების მეორე ტურში, 15:00 საათისთვის, ამომრჩეველთა აქტივობა 20.9% იყო.…
  • პოპულარული

  • კონტაქტი

    • საქართველო, ახმეტა, პანკისი, დუისი.
    • 0 353 22 22 11
    • [email protected]