ტენდერის პირობების მიხედვით, სარეაბილიტაციო სამუშაოებისთვის 23 792 513 ლარი იყო გამოყოფილი (ყველა სახის გადასახადისა და სახელმწიფო მოსაკრებლის ჩათვლით), გამარჯვებული კომპანიის შეთავაზებამ კი 18 989 011 ლარი შეადგინა.

სამუშაოების შესრულება სავარაუდოდ მიმდინარე წლის სექტემბრიდან დაიწყება და 20 თვის ვადაში მთლიანად უნდა დასრულდეს. გზის მოასფალტება ქალაქ ახმეტიდან უნდა დაიწყოს და 2017 წლის ბოლომდე 10 კილომეტრიან მონაკვეთს მოიცავს, დანარჩენი 20 კმ სიგრძის მონაკვეთის მოასფალტება კი 2018 წელს გაგრძელდება.

აღნიშნული საავტომობილო გზის რეაბილიტაცია მსოფლიო ბანკის დაფინანსებით, „შიდასახელმწიფოებრივი გზების აქტივების მართვის პროექტისთვის“ (SRAMP) ფარგლებში განხორციელდება.

ახმეტა – თიანეთის გზა ილტოს ხეობის სოფლებზე და კვეტერას ეკლესიის ტერიტორიაზე გადის. ახმეტის მუნიციპალიტეტში ვარაუდობენ, რომ გზის რეაბილიტაციის შედეგად ილტოს ხეობის სოფლებში სოციალურ–ეკონომიკური პირობები გაუმჯობესდება.