„ხეობის მოსახლეობა მოითხოვს, რომ ამ შემთხვევაში მაინც არ მოხდეს ამ საქმის გადაფარვა სხვა საკითხებით და რაც ყველაზე მთავარია, გრიფი „საიდუმლო“ არ დაედოს, რამენაირად მოსახლეობა დაამშვიდონ. ძალიან დიდი თხოვნა მაქვს ამ ოჯახს, გვარს, მთელ ხეობას ნუ მიიყვანენ იმ მდგომარეობამდე, რომ საკუთარი ძალით ეძებონ სამართალი.

გავიხსენოთ თუნდაც ის შემთხვევა, როდესაც ორმა არასრულწლოვანმა სკოლის მერხიდან გადაწყვიტა ჩაბმულიყო სხვის ომში. ეს ორი ახალგაზრდა თბილისის აეროპორტიდან მშობლების თანხმობის გარეშე გაატარეს საზღვარზე. მაშინდელი მინისტრის, გომელაურის ახსნა იყო, რომ მესაზღვრე შეცდა. ჩვენ ვიცით, რომ ის ადამიანი არც კი დასჯილა, მხოლოდ სამსახურიდან გათავისუფლდა. ჩვენ არ გვინდა, რომ მსგავსი ფაქტის წინაშე დავდგეთ.

ვითხოვთ ობიექტურ გამოძიებას და იმ ადამიანების დასჯას, ვინც ამ უდანაშაულო ახალაგაზრდის სიცოცხლე შეიწირა“, – განაცხადა მექა ხანგოშვილმა გადაცემაში „360 გრადუსი“.

პანკისის ხეობაში ჩატარებული სპეცოპერაციის დროს, სპეცრაზმის მიერ სასიკვდილოდ დაჭრილი თემირლან მაჩალიკაშვილის საქმეს პროკურატურა სამსახურებრივი უფლებამოსილების შესაძლო გადამეტების მუხლით იძიებს. გამოძიება 27 დეკემბერს დაიწყო, თუმცა მისი შედეგები ამ დრომდე ცნობილი არ არის. გამოძიების მიმდინარეობასთან დაკავშირებით, მთავარი პროკურორი ირაკლი შოთაძე დღეს თემირლან მაჩალიკაშვილის ოჯახის წევრებსა და ადვოკატებს შეხვდა.

სახელმწიფო უსაფრთხოების სამსახური თემირლან მაჩალიკაშვილს ახმედ ჩატაევთან და მის დანაშაულებრივ ჯგუფთან კავშირში ადანაშაულებს. სუს-ის განცხადებით, სპეცოპერაციის დროს თემირლან მაჩალიკაშვილი ხელყუმბარის ამოქმედებას აპირებდა, რის გამოც ესროლეს. გარდაცვლილის ოჯახი ამ ბრალდებას უარყოფს.