• მალხაზ მაჩალიკაშვილმა «იმედის» და «პრაიმტაიმის» წინააღმდეგ ქარტიას მიმართა

    პარასკევი, 23 აგვისტო 2019 13:38 view 4847
    მალხაზ მაჩალიკაშვილმა «იმედის» და «პრაიმტაიმის» წინააღმდეგ ქარტიას მიმართა ფოტო © sova.news

    საქართველოს ჟურნალისტური ეთიკის ქარტიის საბჭოს სამდივნომ დასაშვებად სცნო მალხაზ მაჩალიკაშვილის განცხადება ტელეკომპანია „იმედის“ ჟურნალისტის, ნატა მახვილაძის და „პრაიმტაიმის“ რედაქტორის, მირიან ბოქოლიშვილის წინააღმდეგ.

    მალხაზ მაჩალიკაშვილი „იმედის“ და „პრაიმტაიმის“ მიერ მომზადებულ იმ მასალებს ხდის სადავოდ, რომლებიც სპეცრაზმის მიერ მოკლული მისი შვილის, თემირლან მაჩალიკაშვილის სახელობის წყაროს გახსნას ეხება ბანგლადეშში. მასალების მიხედვით, იმ ორგანიზაციის ხელმძღვანელი, რომელმაც წყარო გახსნა, ინტერპოლითაა ძებნილი.

    მალხაზ მაჩალიკაშვილი ამბობს, რომ ჟურნალისტებმა მცდარი და დაუზუსტებელი ინფორმაცია გაავრცელეს, რითიც დაარღვიეს ჟურნალისტური ეთიკის ქარტიის პირველი პრინციპი (სიზუსტე), ამასთან, ფაქტები განზრახ დაამახინჯეს, რასაც ქარტიის მეთერთმეტე პრინციპი უმძიმეს პროფესიულ დანაშაულად მიიჩნევს. მისივე თქმით, დარღვეულია ქარტიის მეშვიდე პრინციპიც, რომელიც დისკრიმინაციას კრძალავს.

    „მიუვალ ადგილებში ღარიბი ადამიანებისთვის წყლის მიწოდება ჩვენმა ოჯახმა ყველაზე ღირსეულ საქმედ ჩათვალა და თემირლანის ხსოვნისთვის ამ კეთილი საქმის გაკეთება გადავწყვიტეთ. ინფორმაცია ორგანიზაციის შესახებ, რომელიც მსგავს საქმიანობას ეწევა ინტერნეტით გავიგეთ და შესაწირის გადარიცხვაც ოფიციალურად მოვახდინეთ. ამ ორგანიზაციის შესახებ ინფორმაცია ადვილად იძებნება ინტერნეტში და ყველასთვის ხელმისაწვდომია მათი საბანკო ანგარიშიც, რომელიც გავლენიან ბრიტანულ ბანკშია გახსნილი. მაგრამ უპასუხისმგებლო მედიამ და ექსპერტებმა, რომლებიც ღიად ატარებენ ხელისუფლების ინტერესებს, ამ საქმეს რაღაც სარჩელი მოუძებნეს და ისეთი შეფასებები გააკეთეს, რომელსაც ვერც კი ვიჯერებდით.

    წარმოუდგენელია, კეთილი საქმეც კი, ამ სისტემამ ჩვენს ოჯახს ამგვარად როგორ შეიძლება შემოუბრუნოს?! ჩვენი იურისტების და სხვა ექსპერტების დახმარებით დავიწყეთ ამ ორგანიზაციის შესახებ ინფორმაციის შეგროვება და ის რაც „პრაიმტაიმმა“ და „იმედმა“ გააჟღერეს, აშკარად გამოგონილი და დაუსაბუთებელი აღმოჩნდა. მათ აშკარად მცდარი ინფორმაციაა გაავრცელეს ისრაელ ახმედნაბიევის, იგივე აბულ უმარ სასითლინსკის საქმიანობასთან და ადგილსამყოფელთან დაკავშირებით და ამ ორგანიზაციასთან დაკავშირების და თანხების გადარიცხვის შესაძლებლობებიც როგორც დახურული და კონსპირაციული პროცესი წარმოაჩინეს, რაც სიმართლეს არ შეესაბამება.

    ეს მასალები განგრძობადი საინფორმაციო კამპანიის ნაწილია, რომლის მიზანია ჩვენი შვილის და ჩვენი ოჯახის ღირსების დაკნინება, თემირლანის ტერორიზმთან თვითნებური დაკავშირება და ამდენად, მისი სიცოცხლის ხელყოფის საქმესთან დაკავშირებით საზოგადოებაში არსებული უკმაყოფილების და სოლიდარობის შესუსტება“, - აღნიშნავს მალხაზ მაჩალიკაშვილი.

    ქარტიის საბჭო მალხაზ მაჩალიკაშვილის განცხადებას სავარაუდოდ სექტემბერში განიხილავს. ჟურნალისტური ეთიკის ქარტიაში მაჩალიკაშვილის ინტერესებს ადამიანის უფლებების სწავლებისა და მონიტორინგის ცენტრი (EMC) იცავს.

    19 წლის თემირლან მაჩალიკაშვილი 2017 წლის 26 დეკემბერს, პანკისში ჩატარებული სპეცოპერაციის დროს, სპეცრაზმმა თავში სასიკვდილოდ დაჭრა. სახელმწიფო უსაფრთხოების სამსახური თემირლან მაჩალიკაშვილს და პანკისის ხეობაში მცხოვრებ კიდევ რამდენიმე პირს საერთაშორისო ტერორისტად აღიარებული ახმედ ჩატაევის და მისი ჯგუფის დახმარებაში ადანაშაულებდა, თუმცა, დაჭრილი მაჩალიკაშვილი 2018 წლის 10 იანვარს ისე გარდაიცვალა, რომ მისთვის ბრალი არ წაუყენებიათ. დანარჩენი პირები დააკავეს. სასამართლომ ისინი დამნაშავეებად სცნო და პატიმრობა მიუსაჯა.

    პროკურატურა თემირლან მაჩალიკაშვილის სასიკვდილოდ დაჭრის ფაქტზე გამოძიებას სისხლის სამართლის კოდექსის 333-ე მუხლის მე-3 ნაწილით აწარმოებს, რაც ძალადობით სამსახურებრივი უფლებამოსილების შესაძლო გადამეტებას გულისხმობს. სპეცოპერაციიდან 20 თვე გავიდა და სისხლის სამართლის პასუხისგებაში არავინ არის მიცემული.

    სახელმწიფო უსაფრთხოების სამსახური ოფიციალურად დღემდე იძიებს საქმეს თემირლან მაჩალიკაშვილის ბრალეულობასთან დაკავშირებით. თემირლანის მშობლებისა და ადვოკატების არაერთი მოთხოვნის მიუხედავად, მათ დაზარალებულის სტატუსი არ მიანიჭეს, რის გამოც საქმის მასალებს ვერ ეცნობიან.

    რადიო WAY

    რადიო WAY

    პანკისის სათემო რადიო WAY – მაუწყებლობს პანკისის ხეობაში სიხშირეზე FM 101.1. სათემო რადიო არასამთავრობო ორგანიზაცია „სამოქალაქო აქტივობების ცენტრმა“ დააფუძნა.

    სიახლეები

    ხვრელების არსებობა რუსეთს ომის გახანგრძლივებაში ეხმარება - ინტერვიუ აშშ-ის ელჩთან

    „სახიფათო ნაბიჯია ურთიერთობების ნორმალიზების მცდელობა იმ ქვეყანასთან, რომელსაც არასოდეს შეუსრულებია…

    ბაზისბანკის მხარდაჭერით, აჭარა აგროჯგუფმა ლურჯი მოცვის ბაღები გააშენა

    ბაზისბანკი, როგორც ბიზნესის ერთ-ერთი უმსხვილესი დამფინანსებელი, აგრძელებს ადგილობრივი ბიზნესის განვითარების…

    ვიბრძოლებთ, რომ საქმე გამოძიებას დაუბრუნდეს - მაჩალიკაშვილი სტრასბურგის გადაწყვეტილებაზე

    „გადაწყვეტილებით ძალიან აღფრთოვანებული თუ არა, კმაყოფილი ვარ, რადგან ის ამბობს,…
  • კონტაქტი

    • საქართველო, ახმეტა, პანკისი, დუისი.
    • 0 353 22 22 11
    • [email protected]