გადაცემის სტუმრები არიან:

არჩილ თოდუა – „საერთაშორისო გამჭვირვალობა - საქართველოს“ ზუგდიდის რეგიონალური ოფისის კოორდინატორი;

კოკა კიღურაძე – „მმართველობითი სისტემის განვითარების ცენტრის“ აღმასრულებელი დირექტორი.

გადაცემის წამყვანია რამზან გორგიშვილი.

არასამთავრობო ორგანიზაცია „საერთაშორისო გამჭვირვალობა - საქართველოს“ კვლევის მიხედვით, 2018-2019 წლებში სახელმწიფო რწმუნებულის ცხრა ადმინისტრაციამ ჯამურად 10 797 168 ლარი დახარჯა. აქედან, შრომის ანაზღაურების სახით 8 212 842 ლარი გაიცა, ხოლო დანამატის, ჯილდოსა და პრემიის სახით – 655 454 ლარი.

კახეთის სახელმწიფო რწმუნებულის ადმინისტრაცია 2019 წელს სახელმწიფო ბიუჯეტიდან 760 ათასი ლარით დაფინანსდა, საიდანაც ათასიდან ნახევარზე მეტი, 443 ათასამდე ამ აპარატის შენახვა დაჯდა.

კვლევის თანახმად, 2018-2019 წლებში დანამატის, ჯილდოსა და პრემიის სახით ყველაზე დიდი ოდენობით თანხა კახეთის გუბერნატორის ადმინისტრაციაში გაიცა – 122 578 ლარი.

2018-2019 წლებში, სახელმწიფო რწმუნებულების ადმინისტრაციებს შორის ყველაზე დიდი ოდენობით საწვავი სამეგრელო-ზემო სვანეთის ადმინისტრაციამ მოიხმარა – 87 060 ლიტრი, რომლის ჯამურმა ღირებულებამ 190 089 ლარი შეადგინა. მეორე ადგილზე კახეთია – 72 705 ლიტრი მოხმარებული საწვავით და ამისთვის დახარჯული 156 633 ლარით.