მისი თქმით, ის ერთადერთი თუშია, რომელიც უმარილო ყველს ამ მეთოდით აწარმოებს. გიორგი ამბობს, რომ დაძველება თუშურ ყველს განსაკუთრებულ გემოს აძლევს.

როგორც კახეთის საინფორმაციო ცენტრს გიორგი ქარსამაულმა უთხრა, ყველს სპეციალურ ტემპერატურაზე დაახლოებით 40 – 50 დღის განმავლობაში ინახავენ. ყველის დეგუსტაცია პირველად, 6 ნოემბერს, ყველის ფესტივალზე მოხდა.

„ჩვენ საწარმოში თუშური ტრადიციული მეთოდით ამოყვანილ ყველს შესაბამის ტემპერატურაზე, ხის თაროებზ,ე მარილის გარეშე, მშრალად, დაახლოებით 40-50 დღის განმავლობაში ვაძველებთ, რაც ყველის განსხვავებულ და განსაკუთრებულ გემოვნურ თვისებებს განაპირობებს. თუშურ ყველს მსგავსი ტექნოლოგიით არავინ აწარმოებს. იდეის მიზანი თუშური ყველის პოპულარიზაცია იყო და გაამართლა. ჩვენი ნაწარმის დეგუსტაცია ყველის ფესტივალზე მოხდა და დიდი მოწონება დაიმსახურა“,- აღნიშნა გიორგი ქარსამაულმა.

გიორგი ქარსამაულმა გუდის ყველის მასობრივი წარმოება ცოტა ხნის წინ დაიწყო. ფერმერი მომავალში თუშური ყველის წარმოების გაზრდას გეგმავს.