პროგრამის ფარგლებში ბიზნეს საქმიანობების მიმართულებით შეზღუდვა არ არსებობს, თუმცა პრიორიტეტულია სერვისზე ორიენტირებული პროექტები, ასევე ქალბატონების და იძულებით გადაადგილებულ პირთა (დევნილთა) მიერ ბიზნესის წამოწყება.

პროგრამაში მონაწილეობა შეუძლია ნებისმიერ პირს თუ აკმაყოფილებს შემდეგ მოთხოვნებს: არის სრულწლოვანი (18 წელს მიღწეული) საქართველოს მოქალაქე; არ არის საჯარო მოხელე; არ გააჩნია მიმდინარე ვადაგადაცილებული საგადასახადო ვალდებულება სახელმწიფოს წინაშე; არ არის დღგ-ს გადამხდელად რეგისტრირებული; კონკურსში გამარჯვების შემთხვევაში, განახორციელებს მინიმუმ 20% თანხობრივ თანამონაწილეობას.

ეკონომიკის სამინისტროს ინფორმაციით, უკვე დაფინანსებულია 4910 მიკრო და მცირე მეწარმე, გადამზადებულთა 8800 ადამიანი, ხოლო დასაქმებულია 5100 ადამიანი.

მიკრო და მცირე მეწარმეობის ხელშეწყობის პროგრამა 2015 წლიდან სახელმწიფო პროგრამის „აწარმოე საქართველოში“ ფარგლებში ხორციელდება და მიზნად ისახავს საქართველოს რეგიონებში მიკრო და მცირე ბიზნესის განვითარებას მეწარმეების დაფინანსებისა და ცოდნის ამაღლების გზით. პროგრამა ორწლიანია და მის განსახორციელებლად ბიუჯეტიდან დაახლოებით 20 მილიონი ლარია გამოყოფილი.