პანკისის ხეობაში ჰესებს შპს „ფერი“ ააშენებს. როგორც პანკისის სათემო რადიოს კომპანიის დირექტორის მოადგილემ ლაშა იორდანიშვილმა განუცხადა, „სამყურისწყალი 1“-სა და „სამყურისწყალი 2“-ის მშენებლობა 2018 წლის ბოლოს დასრულდება. ჰესების ჯამური წლიური გამომუშავება 154,95 მილიონი კილოვატი საათი იქნება.

მისივე ინფორმაციით, წელს ასევე დაიწყება 5 მეგავატი სიმძლავრის კასკადის „ხადორი 3“-ის მშენებლობაც. მშენებლობას შპს „ალაზანი ენერჯი“ განახორციელებს. კომპანიის 100%-ანი წილის მფლობელი ლაშა იორდანიშვილია.

კომპანია „ფერსა“ და საქართველოს ენერგეტიკის სამინისტროს შორის ჰიდროელექტროსადგურების მშენებლობის შესახებ ურთიერთგაგების მემორანდუმი 2015 წელს გაფორმდა. მემორანდუმის მიხედვით, „სამყურისწყალი 1“-ის და „სამყურისწყალი 2“-ის პროექტის ღირებულება დაახლოებით 46 მილიონი დოლარია.

ამავე კომპანიამ 24 მეგავატი სიმძლავრის ჰიდროელექტროსადგური „ხადორი 2“ ააშენა.

„ფერი“ 30%-იან წილს ფლობს კომპანიაში „დარიალი ენერჯი“, რომელმაც ყაზბეგში ჰიდროელექტროსადგური „დარიალი ჰესი“ ააშენა და 8 აპრილს ექსპლუატაციაში გაუშვა.