მისივე თქმით, სახალხო დამცველის აპარატი ქალთა უფლებების დაცვის საკითხებზე ხეობის უხუცეს ქალთა საბჭოსთან თანამშრომლობს.

„ხეობიდან გენდერული ნიშნით ძალადობის თაობაზე ჩვენთვის არავის მოუმართავს, მაგრამ მომართვიანობის არარსებობა არ ნიშნავს, რომ ასეთი ფაქტები არ არსებობს. როგორც წესი, ძალადობის ფაქტები არის ყველა რეგიონში და არ არის გამორიცხული, რომ პანკისის ხეობაშიც იყოს. სახალხო დამცველის აპარტი თანამშრომლობს ადგილობრივ ორგანიზაციებთან, მათ შორის უხუცეს ქალთა საბჭოსთან. რამდენიმე თვის წინ, ახმეტაში, ჩვენი საკონტაქტო პირი დაინიშნა, რომელიც ფარავს რაიონს. შესაბამისად, ვცდილობთ მისი მეშვეობით გარკვეული ინფორმაციის მიღებას. ეს არ ეხება მხოლოდ ძალადობას, ეს ეხება ადრეულ ქორწინებას და ა.შ“,- განაცხადა უჩა ნანუაშვილმა.

სახალხო დამცველის ინფორმაციით, 2016 წლის 10 თვის მონაცემებით, ოჯახში ძალადობის პირობებში 13 ქალი იქნა მოკლული, 2000-ზე მეტ შემთხვევაში კი პოლიციამ დაცვის ღონისძიება გამოიყენა.

სახალხო დამცველის აპარატის განმარტებით, მაღალია ჯანმრთელობის დაზიანებისა და სხვა სასტიკი ფორმებით ჩადენილი ძალადობის რიცხვი. მათივე თქმით, იყო შემთხვევები, როდესაც ოჯახში შესაძლო ძალადობის შესახებ შეტყობინება სამართალდამცავ უწყებაში დანაშაულებრივ ქმედებამდე შევიდა თუმცა, დანაშაულის პრევენცია ვერ მოხერხდა.