მათი ინფორმაციით, ოთარ ხანგოშვილიჩეჩნეთში სამუშაოდ 29 აპრილს გაემგზავრა, 28 ივლისს კი უკან, საქართველოში ბრუნდებოდა. მეგობართან ერთად რუსეთ-საქართველოს საზღვარი გადმოკვეთა კიდეც, რის შემდეგაც ქართველმა სამართალდამცავებმა დაკითხვის მიზნით დააკავეს და ამის შემდეგ მის შესახებ არაფერი იციან.

ოთარ ხანგოშვილის გაუჩინარების შესახებ ოჯახმა პოლიციას 31 ივლისს მიმართა. როგორც პანკისის სათემო რადიოს ოთარ ხანგოშვილის მეუღლემ, ხადიშათ მარგოშვილმა უთხრა, პოლიციაში მას განუცხადეს, რომ დაკავება არ ფიქსირდება.

„ჩემი ქმარი სამი თვის განმავლობაში ჩეჩნეთში იმყოფებოდა, სამუშაოდ იყო წასული. 28 ივლისს დაბრუნდა საქართველოში. რუსეთის გამშვები პუნქტი გადალახა და საქართველოში რომ შემოვიდა, დააკავეს იმ მიზნით, რომ ერთი დღე გადაცდენილი გაქვს და ვლადიკავკაზში უნდა დაბრუნდე ჯარიმის გადასახდელადო. მასთან ერთად ვინც იყო ამხანაგი, ეგ ჩამოვიდა, 6 საათი ველოდებოდი და რომ არ გამოვიდა, მე ჩამოვედიო. ჩემი მეუღლე მას შემდეგ აღარ გამოჩენილა. საქართველოს საზღვარი რომ გადმოკვეთა, დაფიქსირებულია და მერე კვალი აღარ ჩანს. ვერც მობილურზე ვუკავშირდებით. ორი დღის წინ მივმართეთ პოლიციას. ჩვენ ვფიქრობთ, რომ გატაცებულია, რადგან პოლიციაშიც არ ადასტურებენმის დაკავებას“, - ამბობს ხადიშათ მარგოშვილი.

ოთარ ხანგოშვილი სოფელ დუისში ცოლთან და შვილებთნ ერთად ცხოვრობს. ჩეჩნეთში ის პერიოდულად სამუშაოდ მიდიოდა. იგი საქართველოს მოქალაქეა და რუსეთის მოქალაქეობა არა აქვს.

კახეთის პოლიციის დეპარტამენტში განმარტეს, რომ ოთარ ხანგოშვილის ადგილსამყოფელის დადგენის მიზნით დაწყებულია მოკვლევა.