ჩვენ მიერ შეგროვებული ინფორმაციით, დაპირისპირება სოფელ დუისში, უმნიშვნელო ამბავზე დაიწყო და არასწორი ქმედებებით, სამწუხაროდ, შელაპარაკება ჩხუბში გადაიზარდა, რის შედეგადაც დაზარალდა მატანში მცხოვრები ორი ადამიანი. იმავე საღამოს, კონფლიქტი მატანში გაგრძელდა, სადაც პანკისის მცხოვრებს ფიზიკური შეურაცხყოფა მიაყენეს. 

ამ ინციდენტების შესახებ პოლიციისთვის და ხელისუფლების წარმომადგენლებისთვის გუშინვე გახდა ცნობილი. დღეს, სოფელ მატანის მცხოვრებლებმა პანკისის ხეობაში შესასვლელი გზის გადაკეტვა სცადეს. 

სათემო ორგანიზაცია წუხს მომხდარი ინციდენტების გამო და დაპირისპირებულ მხარეებს სთხოვს, მოლაპარაკების ყველა რესურსი გამოიყენონ ვითარების განსამუხტად და მომავალში მსგავსი ინციდენტების თავიდან ასაცილებლად.

ეს ორი სოფლის მცხოვრებთა შორის დაპირისპირების პირველი შემთხვევა არაა. პანკისის სათემო ორგანიზაციას მიაჩნია, რომ ერთი მუნიციპალიტეტის მეზობელ სოფლებში მცხოვრებ ქართველებსა და ქისტებს შორის დაპირისპირების ფაქტები ნასაზრდოებია ხალხებს შორის გაუცხოებით, ხელისუფლების არასწორი პოლიტიკით, ამგვარი ქმედებების მიმართ გულგრილობითა და სამართალდამცავი ორგანოების უმოქმედობით.

ადგილობრივი და რეგიონული ხელისუფლებიდან არც ამჯერად გამოჩენილა ვინმე, ვინც ვითარების დამშვიდებასა და კონფლიქტის მოგვარებას შეეცდებოდა. 

პანკისის სათემო ორგანიზაცია, რამდენიმე თვის წინ, ხეობაში მცხოვრები ქართველებისა და ქისტების ერთობლივი მონაწილეობით სწორედ იმიტომ დაფუძნდა, რომ ვაცნობიერებთ ჩვენ გარშემო არსებულ პრობლემებს, ვხედავთ, რომ ეს პრობლემები საერთოა ხეობის ყველა მცხოვრებისთვის და კარგად გვესმის, რომ მათი გადაჭრა მხოლოდ ერთობლივი ძალებით შეიძლება.