პანკისის ხეობაში, საპარლამენტო არჩევნების მეორე ტური მშვიდ გარემოში მიმდინარეობს და საარჩევნო უბნებთან ხალხმრავლობა და რიგები არ შეინიშნება. 15:00 საათისთვის, პანკისის ხეობის 5 უბანზე, 4843 ამომრჩევლიდან 1012 ადამიანი მივიდა, მათ შორის ჯოყოლოს N23 უბანზე - 181, დუისის N5 უბანზე - 208, დუისის N26 უბანზე - 282, ომალოს N24 უბანზე - 191 და ქვემო ხალაწნის N8 უბანზე 150 ამომრჩეველი.

თელავის, ახმეტის, ყვარლისა და ლაგოდეხის მე-10 საარჩევნო ოლქში „ქართული ოცნების“ და „ნაციონალური მოძრაობის“ კანდიდატები არიან რეგისტრირებულნი. მმართველი პარტიის მაჟორიტარობის კანდიდატმა ირაკლი ქადაგიშვილმა დღეს, თელავის N1 საარჩევნო უბანზე მისცა ხმა, ხოლო ოპოზიციის წარმომადგენელი გიორგი  ბოტკოველი მეორე ტურს ბოიკოტს უცხადებს.

თელავის, ახმეტის, ყვარლისა და ლაგოდეხის მაჟორიტარული საარჩევნო ოლქში საარჩევნო პროცესი 154 უბანზე მიმდინარეობს, რომლებიც საღამოს 20:00 საათისთვის დაიხურება.