„კომპანიამ, რომელიც თუშეთის გზის გაწმენდას უზრუნველყოფს, სამუშაოები თითქმის ერთი თვის წინ დაასრულა. ჩემი ინფორმაციით, თუშეთში, აეროდრომის მშენებლობის მოსამზადებელი სამუშაოებისთვის გზის გაწმენდას სხვა კომპანია გეგმავს, მაგრამ ამინდი რამდენად შეუწყობთ ხელს არვიცი“, – აღნიშნა ბექა ბაიდაურმა.

ზამთარში თუშეთის სოფლებთან დაკავშირება მხოლოდ ვერტმფრენით არის შესაძლებელი.

ახმეტის გამგებლის ინფორმაციით, გასულ წელს, ადგილობრივი ბიუჯეტიდან ვერტმფრენით ფრენისთვის 70 ათასი ლარი გამოიყო და 6 რეისი შესრულდა. „ახლა ბიუჯეტის დაგეგმვის პროცესში ვართ და სავარაუდოდ წელსაც 5-6 რეისს შევასრულებთ“,- განაცხადა ბექა ბაიდაურმა.

დიდთოვლობის გამო, 5-6 თვით ჩაიკეტა პირიქითა ხევსურეთთან დამაკავშირებელი გზაც. შატილში გამგებლის წარმომადგენლის ამირან გოგოჭურის ინფორმაციით, ხევსურეთის მაცხოვრებლებს რაიონულ ცენტრში ჩასვლა მხოლოდ მესაზღვრეების ვერტმფრენით შეუძლიათ, რომელიც თვეში ერთხელ დაფრინავს. მისივე თქმით, ხევსურეთში 20 ოჯახი დარჩა.

„უღელტეხილზე თოვლის საფარი ნახევარ მეტრს აღწევს, რის გამოც ხევსურეთში ასვლა შეუძლებელია. მესაზღვრეების ვერტმფრენი ყოველთვიურად დაფრინავს და მოსახლეობა ამით სარგებლობს. ასევე, ზამთრის არდადაგები რომ დაიწყება, მაშინ იქნება ფრენა და იანვარში უკან ამოვიყვანთ მოსწავლეებსა და მასწავლებლებს. წელს შატილში 10, დანარჩენ სოფლებშიც 10 მოსახლე დარჩა“, - აღნიშნა ამირან გოგოჭურმა.