დისკუსიაში მონაწილეობის მისაღებად მოწვეულები არიან არასამთავრობოების, საერთაშორისო ორგანიზაციებისა და ხელისუფლების წარმომადგენლები. ღონისძიება მედიისთვის დახურული იქნება. ღონისძიება 13:00 საათზე დაიწყება და 16:00 საათამდე გაგრძელდება. მის: ახმეტა, პანკისი, სოფ. დუისი. საკონტაქტო პირები: ეთერ ფანგანი, გელა მთივლიშვილი. ტელ: 599 13 42 13

როგორც ცნობილია, 3 იანვარს, უცნობმა პირებმა დუისის კულტურის სახლს, სადაც არასამთავრობო ორგანიზაცია კახეთის რეგიონული განვითარების ფონდის ოფისი ფუნქციონირებს, ცეცხლი წაუკიდეს. ორგანიზაციის დირექტორმა იზა ბექაურმა განაცხადა, რომ ამ ინციდენტს წინ უძღოდა მუქარები.

კახეთის რეგიონული განვითარების ფონდი ადგილობრივი და საერთაშორისო ორგანიზაციების დახმარებით ხეობაში საგანმანათლებლო, კულტურულ და უფლებადაცვით პროექტებს ახორციელებს. მათ შორის, დუისის კულტურის სახლში ფონდის ძალისხმევით ფუნქციონირებს ცეკვისა და სიმღერის წრეები, ასევე სასწავლო ცენტრი.

ორგანიზაციის და მისი დირექტორის წინააღმდეგ, პანკისში მცხოვრები ახალგაზრდების ნაწილის აგრესია შესამჩნევი მას შემდეგ გახდა, რაც იზა ბექაურმა სხვა არასამთავრობო ორგანიზაციების წარმომადგენლებთან ერთად საჯაროდ განაცხადა, რომ მასობრივად დანიშნული სოციალური დახმარება პანკისში დემოტივაციას იწვევს. პანკისის სათემო რადიოსთვის მიცემული ინტერვიუს გამოქვეყნების შემდეგ, იზა ბექაურის თქმით, მას სოციალურ ქსელში ემუქრებოდნენ და მოუწოდებდნენ, რომ მის ორგანიზაციას პანკისში მუშაობა შეეწყვიტა. აგრესიული ახალგაზრდები მას ქუჩაშიც დახვდნენ და განმარტებების გაკეთებას აიძულებდნენ.

მუქარის შემცველი შეტყობინებები მიიღო პანკისის სათემო რადიომაც.

კახეთის რეგიონული განვითარების ფონდი აპირებს გადახედოს თავის საქმიანობას და შესაძლოა, პანკისის ხეობაში აქტივობები შეამციროს ან საერთოდ შეწყვიტოს უსაფრთხოების საკითხებიდან გამომდინარე.