როგორც პანკისის სათემო რადიოს ახმეტის მუნიციპალიტეტის გამგეობაში განუცხადეს, ხიდის პროექტი თუშეთის გზის გახსნის შემდეგ შემუშავდება, მშენებლობა კი 2017 წელსვე, სეზონის დასრულებამდე დამთავრდება.

სოფელ ზემო ალვანში მცხოვრებმა ალექსი არინდაულმა და ბესიკ ყიზილაშვილმა 330 ამომრჩევლის მიერ ხელმოწერილი პეტიცია ახმეტის საკრებულოში 2017 წლის 12 იანვარს წარადგინეს. პეტიცია არასამთავრობო ორგანიზაცია „სამოქალაქო აქტივობების ცენტრის“ მხარდაჭერით მომზადდა.

თუშეთში, სოფელ ალისგორიდან წაროსკენ მიმავალი გზა გადის ე.წ. „გომეწრის ალაზანზე“, რომელიც თითქმის მთელი წლის განმავლობაში ადიდებულია და ტრანსპორტით გავლა შეუძლებელია. უგზოობის პრობლემა ქმნის გადაულახავ დაბრკოლებებს ადგილობრივი მოსახლეობისა და ჩამოსული ვიზიტორებისთვის. დაახლოებით 5-6 თვის განმავლობაში 7 სოფელი მთლიანად მოწყვეტილია გარესამყაროს, ეს კი ხელს უშლის როგორც მაღალმთიანი თუშეთის სოფლების აღორძინებას, ისე ტურიზმის განვითარებას.

პეტიციაზე ხელმომწერი პირები მიუთითებდნენ, რომ მდინარის აღნიშნულ მონაკვეთზე კაპიტალური ხიდის მოწყობა თუშეთისთვის სასიცოცხლოდ მნიშვნელოვანი საკითხია. ამასთან, აუცილებელია, რომ ხიდმა სულ მცირე 6-7 ტონას გაუძლოს.

აღსანიშნავია, რომ 2015-2016 წლებში ადგილობრივმა თვითმმართველობამ უარი თქვა ახმეტის მცხოვრებლების მიერ წარდგენილი ოთხი პეტიციის დაკმაყოფილებაზე. პეტიციებით მოთხოვნილი იყო პანკისის ხეობის სოფელ ჯოყოლოში სპორტული მოედნის რეაბილიტაცია, სოფელ ომალოში საყოფაცხოვრებო ნარჩენების შესაგროვებელი ურნების განთავსება და ნარჩენების გატანის სერვისის დანერგვა, სოფელ ქორეთში შიდა გზების შეკეთება, თუშეთში საავტომობილო გზის მიმდებარედ საერთო სარგებლობის საპირფარეშოების მოწყობა და ნარჩების შეგროვების მომსახურების დანერგვა. თითოეულ პეტიციას 300-ზე მეტი ამომრჩეველი აწერდა ხელს.