შეხვედრა 14:00 საათზე დაიწყება და დუისის კულტურის სახლში გაიმართება. დასწრება თავისუფალია.

შეხვედრის თემა სავიზო რეჟიმის ლიბერალიზაცია, საქართველოს ევროინტეგრაციის მნიშვნელობა, გამოწვევები და შესაძლებლობებია. მინისტრები ადგილობრივების შეკითხვებს უპასუხებენ.

შეხვედრა საქართველოში ნატოს დღეების ფარგლებში გაიმართება, რომელიც 2 აპრილს დაიწყო და 11 აპრილამდე გაგრძელდება.

დუისის კულტურის სახლში შეხვედრის დასრულების შემდეგ, 15:00 საათზე მინისტრები მონაწილეობას მიიღებენ პანკისის სათემო რადიო WAY–ს გადაცემაში „მთავარი თემა“.

28 მარტს საქართველოს მოქალაქეებისთვის, რომლებიც ბიომეტრიულ პასპორტს ფლობენ, ევროკავშირის/შენგენის წევრ ქვეყნებში უვიზო მიმოსვლა ამოქმედდა. მოქალაქეებს ვიზის გარეშე გამგზავრება შეუძლიათ ევროკავშირის 22 წევრ და 4 არაწევრ ქვეყანაში. უვიზო მიმოსვლა ასევე შესაძლებელია შენგენის 4 კანდიდატ ქვეყანასთან. მოკლევადიანი ვიზიტი გულისხმობს 90 დღეს ნებისმიერი 180 დღის განმავლობაში.