პანკისის ხეობის სოფლებში, განსაკუთრებით წინუბანსა და ქორეთში სასმელი წყალი მღვრიე და ნალექიანია. წყალი განსაკუთრებით გაზაფხულსა და ზაფხულში ბინძურდება და ხშირად მწერები და ქვეწარმავლებიც მოჰყვება. სურსათის ეროვნული სააგენტოს მიერ, პანკისში, 2014, 2015 და 2016 წლებში აღებულ სასმელი წყლის სინჯებში, შემოწმების შედეგად სანიტარული და მიკრობიოლოგიური დარღვევები გამოვლინდა. ამ თემაზე პანკისის სათემო რადიომ არაერთი სიუჟეტი და გადაცემა მოამზადა.

სასმელი წყლით გადაიცემა სხვადასხვა ინფექციური, პარაზიტული და არაინფექციური დაავადებები. წყლით გადამდები დაავადებები გამოვლინდება, როგორც ერთეული შემთხვევების, ასევე ეპიდაფეთქებების სახით. ახასიათებს სეზონური მიმდინარეობა. დაავადებათა შემთხვევები განსაკუთრებით მატულობს ზაფხულის ცხელ პერიოდში.

ყოველწლიურად მსოფლიოში, განსაკუთრებით განვითარებად ქვეყნებში, დიარეული დაავადებებით (ქოლერის ჩათვლით) 1,8 მლნ. ადამიანი იღუპება, მათ შორის 90 %–მდე – 5 წლამდე ასაკის ბავშვები.

წყლის ხარისხობრივი და უვნებლობის მაჩვენებლები მკვეთრად შეიძლება შეიცვალოს ამინდის გაუარესებისა და ისეთი საგანგებო სიტუაციების დროს, როგორიცაა: წყალმოვარდნა, წყალდიდობა, მეწყერი, გვალვა, მიწისძვრა და სხვა.

დაავადებათა კონტროლის ცენტრის ინფორმაციით, წყალმომარაგების სისტემის გაუმჯობესებისა და წყალასაღები მოწყობილობების სწორი მოვლა – ექსპლუატაციის გარდა, მოსახლეობამ აუცილებელია იცოდეს და განახორციელოს შემდეგი პრევენციული ღონისძიებები: წყალსადენში წყლის წყვეტილი მიწოდებისას, წყალმა სასურველია იდინოს არანაკლებ 10 წუთი და შემდეგ გამოიყენოთ წყალი სასმელად ან საკვების მოსამზადებლად. არ გამოიყენოთ წყალი სასმელად ადუღების გარეშე, თუ მის უვნებლობაში დარწმუნებული არ ხართ. ადუღებული წყალი ვარგისია 24 საათის განმავლობაში. სასურველია წყლის გამწმენდი სხვადასხვა ტიპის საოჯახო ფილტრების გამოყენება. შეგროვილი სასმელი წყალი შეინახეთ სუფთა, დახურულ რეზერვუარში და არ გამოიყენოთ წყლის შესანახი ჭურჭელი სხვა დანიშნულებით (რძის ან სხვა სითხის შესანახად).