„დანამდვილებით ვიცი, რომ თემირლანს იარაღი ნამდვილად არ ჰქონდა. ხელყუმბარას კი არა, ელემენტარულად დანას არ ატარებდა ჩემი ძმა. რომც ჰქონოდა, საწოლში ხელყუმბარით ეძინა? ტერორისტი კი არ იყო, ან მკვლელი ასე რომ შემოგვივარდნენ სახლში ღამის 3 საათზე. ჩემი თვალით დავინახე როგორ შეამტვრიეს კარი ჩემი ძმის ოთახში. ოთახიდან როგორც კი კარის ხმა გავიგონე, გამოვიქეცი გარეთ და პირველი რაც დავინახე, ისროლეს იარაღით. 15 წუთის მერე ჩამიყვანეს დაბლა. ჩემი ძმა არ დამანახხეს“, - ამბობს ნატა მაჩალიკაშვილი.

ახმედ ჩატაევთან და მის დანაშაულებრივ ჯგუფთან თემირლან მაჩალიკაშვილის კავშირს კატეგორიულად უარყოფს დაჭრილის მამა, მალხაზ მაჩალიკაშვილი.

„იმიტომ აკავშირებენ, რომ სად რა ხდება რომ გაიგოს, მაგის შნო, ძალა და ენერგია მთავრობას არ გააჩნია. ვიღაცა უნდა გაიწიროს. აი, ეს ხდება. ჩატაევის ხსენებაც არ მინდა. არ ვიცნობდი და არც მქონია მაგასთან არავითარი კონტაქტი. რას ვაპირებთ? ჯერ ამ ჩემს შვილს მივხედავ, რა მდგომარეობა იქნება. მივაბარებ ალაჰს? მივაბარებ. არადა გამოჯანმრთელდება, აი მერე გავაკეთებ, რაც იქნება საჭირო“, - ამბობს მალხაზ მაჩალიკაშვილი.

თემირლან მაჩალიკაშვილს ამ დროისთვის თელავის რეფერალურ საავადმყოფოში ოპერაცია უტარდება. მისი ჯანმრთელობის მდგომარეობა კრიტიკულად მძიმეა. ექიმების განცხადებით, მას ქალა-ტვინის შემავალი ჭრილობა აქვს.

სახელმწიფო უსაფრთხოების სამსახურის კონტრტერორისტულმა დეპარტამენტმა პანკისის ხეობასა და თბილისში სპეცოპერაცია 26 დეკემბერს, ღამის დაახლოებით 3 საათიდან დაიწყო. სპეცოპერაციის ფარგლებში 5 ადამიანია დაკავებული, რომლებიც, სუს-ის განცხადებით, დაკავშირებულები არიან 21-22 ნოემბერს ბერი გაბრიელ სალოსის ქუჩაზე ჩატარებული სპეცოპერაციის შედეგად განეიტრალებული დაჯგუფების წევრებთან და წარმოადგენდნენ მათ ხელშემწყობ პირებს.

როგორც დღეს სუს-ის პრესსპიკერმა ნინო გიორგობიანმა განაცხადა, „თემირლან მაჩალიკაშვილი დაკავებისას შეეცადა წინააღმდეგობა გაეწია სამართალდამცავებისთვის, კერძოდ უნდოდა მოქმედებაში მოეყვანა ხელყუმბარა, რა დროსაც დანაშაულებრივი ქმედების აღსაკვეთად უკიდურესი აუცილებლობიდან გამომდინარე გამოყენებული იქნა პროპორციული ძალა და მოხდა თემირლან მაჩალიკაშვილის მისამართით გასროლა, რის შედეგადაც ამ უკანასკნელმა თავის არეში მიიღო ცეცხლნასროლი დაზიანება“.

სუს-ში აცხადებენ, რომ  დანაშაულებრივ ჯგუფთან კავშირზე მყოფი სხვა პირების გამოვლენის მიზნით საგამოძიებო მოქმედებები გრძელდება.