12:00 საათზე, უხუცეს ქალთა საბჭოს და ქალთა ჯგუფის ინიციატივით, ასევე უხუცესთა კავშირის წარმომადგენლების მონაწილეობით შეკრება გაიმართება დუისში, კახეთის რეგიონული განვითარების ფონდის ოფისში. ორგანიზატორები ერთობლივი განცხადების გავრცელებას აპირებენ.

14:00 საათზე, დუისში, სოფლის გამგეობასთან შეკრებისკენ მოუწოდა ხეობის მცხოვრებლებს პანკისის სალაფიტური თემის იმამმა ბექხან ფარეულიძემ. „ვიკრიბებით პანკისის ხეობის მოსახლეობა, სადაც განვიხილავთ ყველა იმ საკითხს, რომელიც ძალზედ მნიშვნელოვანია ჩვენი ხეობის კეთილდღეობისთვის“, - ნათქვამია იმამის მიერ გავრცელებულ განცხადებაში.

დღის ბოლოს უფლებადაცვითი ორგანიზაციების წარმომადგენლების შეხვედრაა დაგეგმილი პანკისის სათემო რადიოს ოფისში.

საქართველოს სახელმწიფო უსაფრთხოების სამსახურის კონტრტერორისტულმა ცენტრმა პანკისის ხეობაში სპეცოპერაცია 26 დეკემბერს ჩაატარა. ტერორიზმის ხელშეწყობის ბრალდებით 5 პირი დააკავეს: ზურაბ გორნაკაშვილი, რუსლან ალდამოვი, რამაზ მარგოშვილი, ბადურ ჩოფანაშვილი და თემირლან მაჩალიკაშვილი. ეს უკანასკნელი სპეცოპერაციის დროს სპეცრაზმელებმა დაჭრეს. მას ცეცხლნასროლი ჭრილობა თავის არეში აქვს. დაჭრილს თელავის რეფერალურ საავადმყოფოში ოპერაცია ჩაუტარდა. მისი მდგომარეობა მძიმეა. სახელმწიფო უსაფრთხოების სამსახური დაკავებულებს ახმედ ჩატაევისა და მისი თანამზრახველების ხელშეწყობაში ადანაშაულებს.