„ამ საქმეში პრობლემურია როგორც სროლის პროპორციულობის და აუცილებლობის საკითხი, ასევე პრობლემურია რამდენად დროულად აღმოუჩინეს პირველადი სამედიცინო დახმარება დაჭრის შემდეგ და მერე ამ ორი კვირის განმავლობაში ადეკვატური და ჯეროვანი იყო თუ არა მისთვის გაწეული სამედიცინო დახმარება. ჩვენ ამ საკითხებს შევისწავლით დეტალურად და ცხადია, საბოლოო სწორება იმისათვის რომ ამ საქმეზე სიმართლე დადგინდეს, გვაქვს ადამიანის უფლებათა ევროპულ სასამართლოზე“, - აღნიშნა თამთა მიქელაძემ.

მისივე თქმით, საქმის პოლიტიკური კონტექსტის გათვალისწინებით, ადგილობრივი გამოძიების დამოუკიდებლობის და ეფექტიანობის ნდობა დაბალია. „ამის მიუხედავად, ჩვენ ადგილობრივ დონეზე სიმართლის დადგენისთვის უნდა გავაკეთოთ ყველაფერი. სიმართლისთვის ბრძოლა და ჩვენი მაქსიმალური სოლიდარობა არის გზა, რომელიც მაჩალიკაშვილების ოჯახს და პანკისის ხეობის მოსახლეობას სპეცოპერაციის და იარაღის ენით მოლაპარაკე სახელმწიფოს მიერ შექმნილი კრიზისიდან და გაუცხოებისგან დაიცავს“, - ამბობს მიქელაძე.

სახელმწიფო უსაფრთხოების სამსახურის მიერ, 26 დეკემბერს, პანკისის ხეობაში ჩატარებული სპეცოპერაციის დროს, სპეცრაზმის მიერ თავის არეში დაჭრილი 19 წლის თემირლან მაჩალიკაშვილი საავადმყოფოში დღეს გარდაიცვალა.