ვაინახური კულტურის დღეების ღონისძიებებს სამეგრელო-ზემო სვანეთის მცხოვრებლები, პანკისის უხუცესთა კავშირის და ქისტ ქალთა საბჭოს წევრები, სასულიერო პირები და ადგილობრივი ხელისუფლების წარმომადგენლები ესწრებოდნენ.

„ფოთის თეატრში, რომელიც ჯერ კიდევ ნიკო ნიკოლაძის დროს არის აშენებული, ადგილობრივმა შემოქმედებითმა ჯგუფებმა წარმოგვიდგინეს საკმაოდ მაღალი დონის კონცერტი მეგრული ტკბილი სიმღერებით და ჩვენთვის საჩუქრად მოძღვნილი ჩეჩნური ცეკვით.  ყველა აღნიშნავდა ქართულ-ვაინახური ურთიერთობების უძველესი ფესვების, გენეტიკურ ნათესაობის შესახებ, ძალიან ბევრმა გაიხსენა 1990-იანი წლების კრიზისის დროს ქართველებისა და ვაინახების ურთიერთობები. ღონისძიების ბოლოს, ჩვენმა დელეგაციამ ფოთისა და ხობის მიტროპოლიტ მეუფე გრიგოლს ჩეჩნურ ენაზე ნათარგმნი „ვეფხისტყაოსანი“ და  სიმბოლური ჩეჩნური კოშკი გადასცა“, – უთხრა „კავკასიის ქალთა კონგრესის“ თავმჯდომარე მექა ხანგოშვილმა პანკისის სათემო რადიოს.

ვაინახური კულტურის დღეებს ესწრებოდა შერიგებისა და თანასწორობის საკითხებში საქართველოს სახელმწიფო მინისტრის მოადგილე ლაშა დარსალია, რომელმაც ქართულ-ვაინახურ ურთიერთობებზე ისაუბრა. მისი თქმით, საამაყოა, რომ ქართველებსა და ქისტებს მრავალსაუკუნოვანი მეზობლობა, მჭიდრო ისტორიული და კულტურული სიახლოვე აკავშირებთ.

„მისასალმებელია, რომ ქისტებმა, საქართველოში ცხოვრების პერიოდში ქართული კულტურის მრავალი ელემენტი შეითვისეს, მაგრამ საკუთარიც შეინარჩუნეს. ჩვენთვის ძალიან მნიშვნელოვანია ის, რომ საქართველოში მცხოვრები თითოეული ეთნიკური ჯგუფის კულტურა და თვითმყოფადობა დაცული იყოს, მაქსიმალურად წარმოჩინდეს. ვაპირებთ, სამომავლოდ განვაგრძოთ მუშაობა იმისთვის, რომ ხელი შევუწყოთ სამოქალაქო ინტეგრაციის პროცესს, რათა თითოეული ჩვენი მოქალაქე, მიუხედავად ეთნიკური კუთვნილებისა თანასწორი იყოს“, – განაცხადა სახელმწიფო მინისტრის მოადგილემ.

ვაინახური კულტურის დღეები ფოთის მერიისა და შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის ორგანიზებით გაიმართა. მისი მიზანია სამოქალაქო ინტეგრაციის პროცესის ხელშეწყობა, კულტურის თვითმყოფადობის შემადგენელი ელემენტების – ენის, ტრადიციების, შემოქმედების ნიმუშებისა და კულტურული მემკვიდრეობის შენარჩუნება და განვითარება, ქართულ-ვაინახური ურთიერთობების კიდევ უფრო განმტკიცება.

[gallery ID=75]