შეხვედრა 15:00 საათზე დაიწყება და ქვემო ალვანის კულტურის სახლში, დაცული ტერიტორიების ადმინისტრაციის საკონფერენციო დარბაზში გაიმართება.

საუბარი შეეხება თუშეთის სოფლებში მოსახლეობასთან გამართული შეხვედრებისას გამოკვეთილ მნიშვნელოვან პრობლემებს, ასევე, საკითხებს, რომელთა გადაჭრასაც თუშეთის სათემო ორგანიზაციებმა 22-23 ოქტომბერს გამართულ ფორუმზე პრიორიტეტი მიანიჭეს.

მათ შორის არის: თუშეთში სახელმწიფო სერვისებზე ხელმისაწვდომობის გაუმჯობესების მიზნით სოფელ ომალოში საზოგადოებრივი ცენტრის მშენებლობა; თუშეთის ოთხივე ხეობაში შიდა სამანქანო გზების მოწესრიგება; გომეწრიდან წოვათის ხეობის მიმართულებით ახალი გზის მშენებლობა; პანკისი-ხადორის ხეობა-თუშეთის ახალი გზის მშენებლობასთან დაკავშირებული საკითხები; თუშური (წოვა-თუშური) ენის შენარჩუნება გადარჩენის პროგრამის განხორციელება; სოფელ ტბათანას მოქცევა თუშეთის ეროვნული პარკის საზღვრებში; დაცული ტერიტორიების, ეროვნული პარკის სისტემაში მოქნილი მექანიზმის შემუშავება, რათა ადგილობრივმა მცხოვრებლებმა შეძლონ სახლების აღდგენისა და მშენებლობის მიზნით ხე-ტყისა და ფიქალის მოპოვება-გადამუშავება; სახელმწიფო საკუთრებაში არსებული სათიბებისა და სახნავ-სათესი მიწების იჯარით გაცემის საკითხების გადაწყვეტა; სამოქალაქო ფრენების გაგრძელების შესაძლებლობა ახმეტა-თუშეთი-ახმეტის მიმართულებით 2018-2019 წლებში.

შეხვედრაში მონაწილეობას მიიღებენ ახმეტის მუნიციპალიტეტის მერიის ხელმძღვანელი პირებიც. დასწრება თავისუფალია.

შევედრა-დისკუსია აღმოსავლეთ-დასავლეთის მართვის ინსტიტუტის (EWMI) მხარდაჭერით გაიმართება.