როგორც პანკისის სათემო რადიოს თემირლან მაჩალიკაშვილის მამამ, მალხაზ მაჩალიკაშვილმა უთხრა, მისი მეუღლე და შვილი მინისტრებს დუისშივე დახვდებიან. „არაფერი ვიცოდი ამ შეხვედრის შესახებ. მივიდნენ და დახვდებიან. მე თბილისში ვარ, მეც ჩავალ.

იმ ადამიანებს მინდა ვკითხო, რა სინდისით მასპინძლობენ და ხვდებიან მინისტრებს პანკისში? თემირლანი მხოლოდ მე მომიკლეს?

ხომ გითხარით, მეც ჩავალ ხვალ პანკისში და ვნახოთ, როგორ გამართავენ შეხვედრებს. ვინც იმ შეხვედრაზე მივა, თვალებში ჩაგვხედოს შვილმოკლულ მშობლებს და პასუხი გაგვცეს. ვითხოვ, რომ სახელმწიფომ აღიაროს ჩადენილი დანაშაული; აღიარონ, რომ თემირლანი არ იყო ტერორისტი“, - აღნიშნა მალხაზ მაჩალიკაშვილმა.

პანკისის სათემო რადიოს ინფორმაციით, მინისტრები 15:00 საათზე, იუსტიციის სახლის ყვარელწყლის საზოგადოებრივ ცენტრში პანკისის უხუცესთა კავშირის წევრებს შეხვდებიან, 16:00 საათზე კი ქალთა საბჭოს. შესაძლოა, ცქიტიშვილი და ციხელაშვილი ახალგაზრდებსაც შეხვდნენ, სავარაუდოდ 12:30 საათზე, საზოგადოებრივ ცენტრში. სამინისტროების ცნობით, შეხვედრები მედიისთვის დახურული იქნება. პანკისის სათემო რადიო აპირებს, ყველა შეხვედრას დაესწროს და სრულად, პირდაპირ ეთერში გააშუქოს.

19 მაისს, პანკისის სოფელ ზემო ხალაწნის თემში (ომალო, ზემო ხალაწანი, დუმასტური, შუა ხალაწანი და ქვემო ხალაწანი) საკრებულოს შუალედური არჩევნები იმართება. შეგახსენებთ, გასულ წელს, სოფელ ომალოში საპრეზიდენტო არჩევნების პირველი ტური „ნაციონალური მოძრაობის“ კანდიდატმა მოიგო.