• პანკისის უხუცესთა კავშირი ძალადობას გმობს და სათემო რადიოს მხარდაჭერას უცხადებს

    სამშაბათი, 08 სექტემბერი 2020 14:28 view 3746
    პანკისის უხუცესთა კავშირი ძალადობას გმობს და სათემო რადიოს მხარდაჭერას უცხადებს

    პანკისის სათემო რადიოს და მისი დამფუძნებლის წინააღმდეგ გამართულ აქციებთან დაკავშირებით განცხადებას ავრცელებს პანკისის უხუცესთა კავშირი.

    „უხუცესთა კავშირი ყურადღებით ადევნებდა თვალს სოფელ დუისში იმ შენობის გასხვისებასთან დაკავშირებულ მოვლენებს, რომელშიც განთავსებულია პანკისის ეთნოგრაფიული მუზეუმი, სამკერვალო, სამკურნალო მასაჟისა და სტომატოლოგიის კაბინეტები, პანკისის სათემო რადიო „ვეი“ და ორი ოჯახი, უმეტესი ფართობი კი უკავია როდი სკოტის ფონდის მიერ დაფინანსებულ ინგლისური ენის შემსწავლელ კურსებს.

    როდი სკოტის ფონდის წარმომადგენელმა, კურსების ხელმძღვანელმა წამოიწყო ეს კამპანია, მაგრამ როგორც შემდგომ განვითარებულმა მოვლენებმა ცხადყო, ბოლომდე ვერ გათვალა მოსალოდნელი შედეგი - მის მიერ მოწყობილი აქცია გადაიზარდა რადიო „ვეის“ და მისი დამფუძნებლის, ჟურნალისტ გელა მთივლიშვილის წინააღმდეგ მიმართულ კამპანიად, რაც ძალიან სამწუხაროა“.

    უხუცესთა კავშირი განცხადებაში ყურადღებას ამახვილებს სათემო რადიოს მიერ განხორციელებულ აქტივობებზე.

    „ლოპოტას ხეობაში ქისტ-ჩეჩნების რაზმის ამოხოცვის დროს, ვინ გამოდიოდა ქისტების დასაცავად? ვინ ედგა მხარში ვახა მაჩალიკაშვილს ერთადერთი ვაჟიშვილის საკუთარ ლოგინში მუხანათურად მოკვლის შემდეგ? ვინ იღვწოდა პანკისის ხეობაში სხვადასხვა საერთაშორისო ორგანიზაციების შემოყვანასა და პანკისის სოციალურ-ეკონომიკური მდგომარეობის გაუმჯობესებისათვის?

    ვინ ეხმარებოდა ქისტ ახალგაზრდებს სხვადასხვა პროექტების განხორციელებასა და მცირე ბიზნესის წამოწყებაში? ამ ადამიანს, ვინც უანგაროდ ეხმარებოდა პანკისელებს თავიანთი უფლებების დაცვასა და ცხოვრების უკეთ მოწყობაში, ემუქრებიან, პანკისიდან გაძევებას პირდებიან ახალგაზრდები, ვისაც წარმოდგენაც არ აქვთ მის საქმიანობასა და საერთოდ პანკისის ხეობაში წლების განმავლობაში არსებულ ვითარებასა და აქ განვითარებულ მოვლენებზე. საინტერესოა, როცა ასეთ პასუხისმგებლობას იღებენ საკუთარ თავზე, ვინ მისცათ უფლება ასეთი განცხადებები აკეთონ.

    მოვლენები ისე ვითარდება ქისტური თემის ახალგაზრდების გარკვეულ ნაწილში, რომ საკუთარი თავის განადგურებისაკენ მივდივართ. ჩვენ, უხუცესებს ბევრი გვინახავს, ბევრი გაგვიგონია და ვიცით, როგორ მთავრდება ასეთი რადიკალური მოვლენები და ის ვინც თავზე იღებს ასეთი ძალის მართვას, უფსკრულისაკენ მიემართება.

    პანკისის სათემო რადიო „ვეი“-ს მიმართ აგრესიული განწყობილება ვაჰაბიტ-სალაფიტებში ადრეც იყო. მთივლიშვილის წინააღმდეგ გამოხტომებიც ბევრი ყოფილა, არც თავიანთი უხუცესების მიმართ უკადრისი მიმართვების ხმარებას მორიდებიან, მაგრამ აგრესიულ მუქარას ადგილი არ ჰქონია! აქ დაინტერესებულმა პირმა ეშმაკური ფანდი იხმარა - გელა მთივლიშვილი შენობას ყიდულობს და ინგლისური ენის უფასოდ შემსწავლელ კურსებს დახურავსო, რაც სიმართლისგან ძალზე შორსაა, რადგანაც გელა მთივლიშვილს აზრად არ მოსვლია ამ შენობის შესყიდვა და ეს ყველაფერი გათვლილი იყო ხალხის ემოციებზე ზემოქმედებისთვის: აი, ხედავთ, ვიღაც ჟურნალისტი გვართმევს შენობასო. შეიძლება ითქვას, აზრის მესვეურებმა თავიანთ მიზანს ნაწილობრივ მიაღწიეს და ჟურნალისტის წინააღმდეგ კიდევ უფრო განაწყვეს გარკვეული ძალები. მთავარი მაინც ის არის, რომ მომიტინგეთა მხრიდან არ მოხდა არანაირი კონკრეტული დანაშაულის გამოკვეთა ჟურნალისტის მიმართ, მხოლოდ ზოგადი ფრაზებით შემოიფარგლნენ, ეს იყო და ეს.

    აშკარაა რომ ამ ადამიანების უკან დგას გარკვეული ძალა რომელიც თვითონ შენიღბულია და სხვებს იყენებს, ეს ხომ ამ ქვეყნის ძლიერთათვის დამახასიათებელი თვისებაა.

    როცა ამა თუ იმ ნაბიჯს თვითნებურად ვდგამთ, უნდა გვახსოვდეს, რომ პირადი ინტერესები კი არა, უპირველესად ხეობის ინტერესებია გასათვალისწინებელი, ის შედეგები, რაც ასეთ ქმედებას მოჰყვება. იმაზეც ვიფიქროთ, როცა ასეთ გადაწყვეტილებას ვიღებთ, ვართ თუ არა მზად იმისათვის, რომ მსგავსი საკითხები ხეობის სასარგებლოდ გადავწყვიტოთ“, - ნათქვამია განცხადებაში.

    29 აგვისტოს და 5 სექტემბერს სოფელ დუისში პანკისის სათემო რადიოს და მისი დამფუძნებლის წინააღმდეგ აქციები გაიმართა. აქციის ზოგიერთი მონაწილე სათემო რადიოს დარბევით და ჟურნალისტის საქმიანობაში ხელის შეშლით დაიმუქრა. დანაშაულის ნიშნების შემცველი განცხადებების გაკეთების მიუხედავად, შინაგან საქმეთა სამინისტრომ ამ დრომდე არ დაიწყო გამოძიება. დღეს სახალხო დამცველმა შსს-ს მოუწოდა, პანკისის რადიოს მიმართ მუქარა გამოიძიოს.

    რადიო WAY

    რადიო WAY

    პანკისის სათემო რადიო WAY – მაუწყებლობს პანკისის ხეობაში სიხშირეზე FM 101.1. სათემო რადიო არასამთავრობო ორგანიზაცია „სამოქალაქო აქტივობების ცენტრმა“ დააფუძნა.

    სიახლეები

    ხვრელების არსებობა რუსეთს ომის გახანგრძლივებაში ეხმარება - ინტერვიუ აშშ-ის ელჩთან

    „სახიფათო ნაბიჯია ურთიერთობების ნორმალიზების მცდელობა იმ ქვეყანასთან, რომელსაც არასოდეს შეუსრულებია…

    ბაზისბანკის მხარდაჭერით, აჭარა აგროჯგუფმა ლურჯი მოცვის ბაღები გააშენა

    ბაზისბანკი, როგორც ბიზნესის ერთ-ერთი უმსხვილესი დამფინანსებელი, აგრძელებს ადგილობრივი ბიზნესის განვითარების…

    ვიბრძოლებთ, რომ საქმე გამოძიებას დაუბრუნდეს - მაჩალიკაშვილი სტრასბურგის გადაწყვეტილებაზე

    „გადაწყვეტილებით ძალიან აღფრთოვანებული თუ არა, კმაყოფილი ვარ, რადგან ის ამბობს,…
  • კონტაქტი

    • საქართველო, ახმეტა, პანკისი, დუისი.
    • 0 353 22 22 11
    • [email protected]