დაცვის მხარე გია ლორთქიფანიძის აღკვეთის ღონისძიების გარეშე დატოვებას ითხოვდა. როგორც ადვოკატებმა პროცესზე განმარტეს, ოდესის პოლიციის უფროსისთვის პატიმრობის შეფარდების არავითარი საფუძველი არ არსებობდა. მათ სასამართლოს ლორთქიფანიძის საქართველოში ჩამოსვლის მტკიცებულებად საქართველოს მიმართულებით 15 ოქტომბრისთვის ნაყიდი ავიაბილეთიც წარუდგინეს.

ადვოკატმა გიორგი გელხაურმა ლორთქიფანიძის განცხადებაც წაიკითხა, სადაც ის წერს, რომ 15 ოქტომბერს იღებს სამსახურეობრივ შვებულებას და საქართველოში ჩამოდის. შემდეგ კი მზადაა გამოცხადდეს როგორც სასამართლოში, ისე საგამოძიებო ორგანოებში.

საქმეზე წინასასამართლო სხდომა 12 ნოემბერს, 11:00 საათზე ჩაინიშნა.

გია ლორთქიფანიძეს ბრალი სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტით აქვს წაყენებული, რაც გულისხმობს სამსახურებრივი უფლებამოსილების გადამეტებას, ძალადობით. პროკურატურის განცხადებით, 2011 წლის 26 მაისს, რუსთაველის გამზირზე შეკრებილი მომიტინგეების დარბევა და მათი მასობრივი დაკავება, შს ყოფილმა მინისტრმა ივანე მერაბიშვილმა მის მოადგილეს, გიორგი ლორთქიფანიძეს დაავალა.

გია ლორთქიფანიძეს უკავშირებენ 2012 წელს საქართველოში ჩეჩენი მებრძოლების ჩამოყვანის ორგანიზებას, გაწვრთნასა და შეიარაღებას. სახალხო დამცველის უჩა ნანუაშვილის განცხადებით, საქართველოში ჩამოყვანილ ჩეჩნებს პირდებოდნენ „კორიდორის“ მიცემას რუსეთის ტერიტორიაზე გადასასვლელად, რასაც 2012 წლის 28 აგვისტოს, კახეთში, ლოპოტას ხეობაში სპეცოპერაციის ჩატარება მოჰყვა. სპეცოპერაციის შედეგად მოხდა შეიარაღებული ჯგუფის 7 წევრის ლიკვიდაცია, მათ შორის იყვნენ საქართველო მოქალაქე ეთნიკური ქისტებიც. ასევე დაიღუპა სპეცრაზმის 2 წევრი, სოლომონ წიკლაური და არჩილ ჩოხელი. დაიღუპა თავდაცვის სამინისტროს სპეციალური ოპერაციების ძალების ექიმი, კაპრალი ვლადიმერ ხვედელიძეც.