საკრებულოს 2016 წლის 28 დეკემბრის რიგგარეშე სხდომაზე განსახილველად მხოლოდ ერთი საკითხი - მომავალი წლის ბიუჯეტის დამტკიცება იყო შეტანილი. სხდომას სულ საკრებულოს 20 წევრი ესწრებოდა, რომელთაგან ბიუჯეტის პროექტს მხარი 14-მა დაუჭირა, წინააღმდეგი იყო 2, ხოლო 4-მა კენჭისყრაში მონაწილეობა არ მიიღო.

ბიუჯეტის პროექტის განხილვას არ ესწრებოდა ახმეტის გამგებელი ბექა ბაიდაური, რომელიც შვებულებაშია გასული და მეუღლესთან ერთად საბერძნეთში ისვენებს. ამის გამო პროექტი საკრებულოს სხდომაზე გამგეობის საფინანსო-საბიუჯეტო სამსახურის უფროსმა არსენ ბუღრიძემ წარადგინა.

საკრებულოს ზოგიერთმა წევრმა კახეთის საინფორმაციო ცენტრთან საუბარში განაცხადა, რომ პროექტს მხარი მისი ბუნდოვანი შინაარსის გამო არ დაუჭირეს. მათი განმარტებით, ბიუჯეტის პროექტის გადმოცემაც კი პრობლემად არის გამხდარი და იგი მხოლოდ სხდომის წინ გადასცეს.

„შევამჩნიეთ, რომ გამგეობა ციფრებით მანიპულირებს, მათ კომისიაზე და სხდომაზე პროექტის რამდენიმე ვარიანტი ჰქონდათ. საფუძვლიანი ეჭვი გვაქვს, რომ საკრებულოს სხდომაზე მეტნაკლებად მისაღები ვერსია შემოაქვთ, ხოლო შემდეგ „საკანონმდებლო მაცნეში“ სხვა ვერსიას აგზავნიან, სადაც მათთვის სასურველი თანხებია ჩაწერილი“, - აცხადებენ საკრებულოს წევრები.

ახმეტის მუნიციპალიტეტის ადგილობრივი ბიუჯეტის შემდგომი განხილვა საკრებულოს მორიგი სხდომაზე იგეგმება, რომელიც 2017 წლის 3 იანვარს უნდა ჩატარდეს.