გადაცემა „ფოკუსში“ რამზან გორგიშვილის შეკითხვებს პასუხობს აკაკი ზოიძე – ექიმი, ჯანდაცვის სფეროს ექსპერტი და ილიას სახელმწიფო უნივერსიტეტის ასოცირებული პროფესორი.

ვაქცინაცია კაცობრიობას დაეხმარა ისეთი დაავადებების წინააღმდეგ იმუნიტეტის გამომუშავებაში, როგორებიცაა ყვავილი, წითელა, წითურა, ყბაყურა, ტუბერკულოზი, ტეტანუსი, ცოფი და სხვა. აქედან ყვავილი, რომელიც ერთ-ერთი ყველაზე ძველი და მომაკვდინებელი ინფექცია იყო, ვაქცინის გამოგონების შემდეგ სრულად აღმოიფხვრა. დღეს მსოფლიო ებრძვის ახალ კორონავირუსს, რომელმაც, ჯანდაცვის მსოფლიო ორგანიზაციის მონაცემებით, 4 მილიონ 200 ათასზე მეტი ადამიანის სიცოცხლე უკვე იმსხვერპლა. გარდა ამისა, კორონავირუსის პანდემიას მოჰყვა საზღვრების ჩაკეტვა და გადაადგილების შეზღუდვა, შექმნა ეკონომიკური კრიზისები, ამოქმედდა უამრავი შეზღუდვა და რეგულაცია, რამაც ადამიანთა ფსიქოლოგიურ ჯანმრთელობაზეც იქონია გავლენა. პანდემიამ გააერთიანა მსოფლიო და მოკლე ხნაში შექიმნა ვაქცინა კორონავირუსის წინააღმდეგ, რომელიც დღეს მის დასამარცხებლად ერთადერთ ეფექტურ საშუალებად ითვლება და თუ გადავხედავთ სხვადასხვა ქვეყნების სტატისტიკას, სადაც მასობრივი ვაქცინაცია მიმდინარეობს, მაშინ ვნახავთ, რომ კოვიდით სიკვდილიანობის და ჰოსპიტალიზაციის შემთხვევები მნიშვნელოვნად არის შემცირებული.