„იყო მუქარები, რომ „გაეთრიეთ პანკისიდან“, „თქვენი საქმიანობა ჩვენთვის მიუღებელია“ და ა.შ. მე ვფიქრობ, რომ კლუბში ხანძრის გაჩენა და გადაწვის მცდელობა, ერთ-ერთი გაფრთხილება იყო ჩემთვის“, - აცხადებს იზა ბექაური, არასამთავრობო ორგანიზაცია კახეთის რეგიონული განვითარების ფონდის დირექტორი. 3 იანვარს, საღამოს, ცეცხლი წაუკიდეს დუისის კულტურის სახლს, სადაც ამ არასამთავრობო ორგანიზაციის ოფისია განთავსებული.

პანკისის ხეობის სოფელ დუისის კულტურის სახლს, სადაც არასამთავრობო ორგანიზაცია კახეთის რეგიონული განვითარების ფონდის საზოგადოებრივი ცენტრი ფუნქციონირებს, ცეცხლი წაუკიდეს. ფონდის დირექტორის იზა ბექაურის განცხადებით, შენობას ბენზინი მიასხეს და ცეცხლი განზრახ გააჩინეს.

პანკისის ხეობის სოფელ დუისში ქავთარაშვილების გვარის წარმომადგენლები არიან შეკრებილი და პოლიციისგან სწრაფ და ეფექტურ რეაგირებას ითხოვენ გვიან ღამით მომხდარი დანაშაულის გამო. სავარაუდოდ, შურისძიების მოტივით, ომარ ქავთაროვის საცხოვრებელი სახლი გადაწვეს. ხანძრის შედეგად არავინ დაშავებულა, რადგან იმ დროისთვის სახლში არ იმყოფებოდნენ. ქავთარაშვილებს ეჭვმიტანილიც ჰყავთ.