„ეს მართლაც მტკივნეული პრობლემაა პანკისის ხეობაში. ვგულისხმობ ახალგაზრდობის ბევრი ნაწილის მიერ ნარკოტიკების მოხმარებას. ეს როგორც რელიგიის, ასევე ჯანმრთელობის მხრივ საზიანოა. ყველა, ვინმეს თუ საშუალება გააჩნია, წინ უნდა აღუდგეს ამ სენს რაც ახალგაზრდებშია“, - აცხადებს პანკისის ხეობის სალაფიტური თემის იმამი ზურაბ ქავთარაშვილი პანკისის სათემო რადიოსთან ინტერვიუში. 

„ამან პანკისში ძალიან ბევრი პრობლემა უკან მოიტოვა, იმდენად ბევრი ახალგაზრდაა ჩართული. კანაფსაც აღარ ეხება საქმე, რომლის მოხმარებაც ძალიან გაზრდილია, 11-12 წლის ბავშვები უკვე მარიხუანას ეწევიან. წარმოიდგინეთ რა სიტუაცია გვაქვს. ახალგაზრდა ბიჭები „კრაკადილზე“ გადავიდნენ, ამას აღარაფერი შველის. ბევრმა ადამიანმა იცის ადგილები, სადაც ესენი იკრიბებიან, „კრაკადილს“ ამზადებენ, ნემსს იკეთებენ, მაგრამ პოლიციიდან არავინ იქ წამსვლელი, არავინ დაჯარიმებულიც კი მე არ გამიგია“, - „კრაკადილი“ რომელზეც პანკისის ხეობაში მცხოვრები სამოქალაქო აქტივისტი სულხან ბორძიკაშვილი საუბრობს, კუსტარულად დამზადებული ნარკოტიკია.

პანკისის ხეობაში სალაფიტური თემის იმამად 45 წლის ზურაბ ქავთარაშვილი (აბუ მუსლიმი) აირჩიეს. ზურაბ ქავთარაშვილი 2003 წლიდან 2018 წლის ზაფხულამდე იორდანიაში ცხოვრობდა, სადაც სასულიერო განათლება მიიღო. იგი დოქტორანტია ყურანის განმარტების სფეროში.