„ისინი ამტკიცებენ, რომ რუსეთში პოლიტიკურ დევნას ადგილი არ აქვს. შეგიძლიათ ინტერნეტი გახსნათ და გეტყვით, თუ რა მოხდა ბოლო ორი კვირის განმავლობაში. ჩეჩნეთში, გროზნოში ნარკოტიკი ჩაუდეს უფლებადამცველი ორგანიზაციის ხელმძღვანელს ტეტიევს. დაღესტანში, სამი დღის წინ, ცეცხლი წაუკიდეს უფლებადამცველის მანქანას. ინგუშეთში უფლებადამცველი ორგანიზაციის „მემორიალის“ ოფისს ცეცხლი წაუკიდეს. არ ვიცი კიდევ რა მტკიცებულებებია საჭირო. ეს მხოლოდ ის არის, რაც ერთი თვის განმავლობაში მოხდა. მე არ ვამბობ, რა მოხდა ჩრდილოეთ კავკასიაში ბოლო სამი წლის განმავლობაში, - 23 ჟურნალისტი მოკლეს“, - ამბობს მიკაილ კადიევი.

მან ლტოლვილთა სამინისტროს თავშესაფრის მიღების თხოვნით დეკემბერში მიმართა. კადიევი ითხოვდა, რომ მისი საქმე 2017 წლიდან ამოქმედებული „საერთაშორისო დაცვის შესახებ“ კანონით განეხილათ. ლტოლვილთა სამინისტროში განაცხადეს, რომ ახალი კანონით ვერ მოხდება იმ ადამიანის საქმის ხელახლა შესწავლა, ვისაც თავშესაფრის მინიჭებაზე ძველი კანონით ეთქვა უარი.

კადიევის ადვოკატის მალხაზ პატარაიას განცხადებით, ლტოლვილთა სამინისტროს არგუმენტი აბსურდულია და მიკაილ კადიევის რუსეთში ექსტრადიციის დასაჩქარებლად უწყება წინააღმდეგობებს განზრახ ქმნის.

„ჩვენი განცხადება პირველად არ მიიღეს წარმოებაში, შემდეგ კი გვიპასუხებს, რომ ახალ კანონს უკუქცევითი ძალა არ აქვს და საქმეს ხელახლა ვერ შეისწავლიან. ეს არის აბსურდი. სამართლის ზოგადი პრინციპია, რომ უპირატესობა ენიჭება ყველა კანონს, რომელიც პირის მდგომარეობას ამსუბუქებს და უკეთეს მდგომარეობაში აყენებს მას. ამაზე შევიტანეთ ადმინისტრაციული საჩივარი, რაც ასევე არ მიიღეს წარმოებაში და განგვიმარტეს, რომ სასამართლოსთვის მიგვემართა. ძველი კანონით იქნება თუ ახლით, როგორც კი პირი განცხადებას წარადგენს თავშესაფრის მოთხოვნის შესახებ, ეძლევა თავშესაფრის მაძიებლის ცნობა, რომლის საფუძველზეც იუსტიციის სამინისტროს სერვისების განვითარების სააგენტო გასცემს შესაბამის დოკუმენტს. ეს ცნობაც არ მოგვცეს. ეს საბუთი არა მხოლოდ ექსტრადიციისგან და დეპორტაციისგან იცავს კადიევს, არამედ აღჭურავს მას უფლებებით. საექსტრადიოციო საქმე ჯერ დაწყებული არ არის და როგორც ჩანს, ეს საქმე რომ დააჩქარონ ამისთვის აკეთებენ ამ ყველაფერს“, - განაცხადა მალხაზ პატარაიამ პანკსის სათემო რადიოსთან.

მიკაილ კადიევი 4 წელია საქართველოში თავშესაფრის მიღებას ცდილობს. ლტოლვილთა სამინისტრომ ლტოლვილის სტატუსის მინიჭებაზე უარი პირველად 2014 წელს უთხრა. სამინისტრომ კადიევის საქმე მეორედ 2015 წელს მას შემდეგ განიხილა, რაც თბილისის სააპელაციო სასამართლომ სამინისტროს პირველი გადაწყვეტილება გააუქმა და უწყებას საქმის ახლიდან განხილვა დაავალა. ამჯერადაც სამინისტრომ არ დააკმაყოფილა კადიევის მოთხოვნა. ეს გადაწყვეტილება 2017 წლის ოქტომბერში სააპელაციო სასამართლომ ძალაში დატოვა. ლტოლვილთა სამინისტრო თავის დასკვნაში აღნიშნავს, რომ ვერ დადასტურდა მიკაილ კადიევის მიერ მიწოდებული ინფორმაცია, რომ ის რუსეთის ხელისუფლების მიერ იდევნება დაღესტანში ადამიანის უფლებების დასაცავად მისი სამოქალაქო აქტივობების და განსხვავებული რელიგიური მრწამსის გამო.

მიკაილ კადიევს რუსეთის ხელისუფლება 2009 წელს, მოსკოვში მომხდარ მკვლელობაში ადანაშაულებს. კადიევი მკვლელობაში მონაწილეობას უარყოფს. მისი თქმით, მკვლელობის დღეს ის არა მოსკოვში, არამედ დაღესტანში იმყოფებოდა, სამსახურში იყო და ამას არაერთი პირი ადასტურებს. მისივე თქმით, რუსეთის სამართალდამცავი ორგანოები მას განსხვავებული მოსაზრებებისა და სამოქალაქო აქტიურობის გამო დევნიან.