დავით ალხანაშვილის მშობლები თელავის რაიონის სოფელ შალაურში ცხოვრობენ. ოჯახის ახლობლების თქმით, ცხედარს საქართველოში უახლოეს დღეებში გადმოასვენებენ.

ახლობლების ინფორმაციით, დავით ალხანაშვილი რესტორანში იმყოფებოდა, რა დროსაც მას დაურეკეს, გარეთ გასვლის შემდეგ კი ზურგში ესროლეს. დაჭრილი ალხანაშვილი კლინიკაში გადაიყვანეს, მაგრამ მისი გადარჩენა ვერ მოხერხდა.

ერთ-ერთი ვერსიით ალხანაშვილი შესაძლოა კანონიერი ქურდის ზაქარია კალაშოვის, იგივე „შაქრო მოლოდოის“ კლანის წევრებმა მოკლეს. თურქული მედია წერს, რომ ალხანაშვილი კანონიერი ქურდის, ტარიელ ონიანის დაჯგუფებაში იყო და 2011 წელს, „შაქრო მოლოდოის“ ნათესავზე დავით ოზმანოვზე (დათო კრასნოდარსკი) თავდასხმაში მონაწილეობდა. 2011 წელს, ბელგიაში ქურდული გარჩევის დროს „დათო კრასნოდარსკის“ დანით მრავლობითი ჭრილობა მიაყენეს. მას თავს დაესხნენ როინ უგლავა (მატევიჩი), ირაკლი ყალიჩავა (ხუტუ) და გია გურჩიანი (სვანი). ამ გზით ონიანისა და ჯანგველაძის კლანმა ოზმანოვი ტარიელ ონიანთან დაკავშირებით „პრაგონის“ გამო დასაჯა. დაჭრილი დავით ოზმანოვი გადარჩა, თუმცა მასზე თავდამსხმელებს სასიკვდილო განაჩენი გამოუტანეს.