„ვითომ დღეს დილით გადაგვყვავდა და სპეციალურად მომიკლეს შვილი ამ სადისტებმა და ფაშისტებმა. არაფრის გულისთვის“, - განაცხადა მედიკო მარგოშვილმა საავადმყოფოში.

პანკისში ჩატარებული სპეცოპერაციის დროს თავის არეში დაჭრილი 19 წლის თემირლან მაჩალიკაშვილი დღეს დილით გარდაიცვალა. ექიმ ზაზა ლურსმანაშვილის განცხადებით, გამთენიისას პაციენტის მდგომარეობა გართულდა და გული ოთხჯერ გაუჩერდა.

ოჯახი თემირლან მაჩალიკაშვილის ბერლინის კლინიკაში გადაყვანას ითხოვდა, რაზეც ოფიციალური უარი გუშინ მიიღეს. ამის შემდეგ პაციენტის თურქეთში, კლინიკა „კოჩ-ჰოსპიტალში“ გადაყვანა იგეგმებოდა.

თემირლან მაჩალიკაშვილი 26 დეკემბერს, პანკისში ჩატარებული სპეცოპერაციისას სპეცრაზმმა თავის არეში, საკუთარ საძინებელ ოთახში დაჭრა. მისი ჯანმრთელობის მდგომარეობა უკიდურესად მძიმე იყო.

როგორც სახელმწიფო უსაფრთხოების სამსახურის პრესსპიკერმა, ნინო გიორგობიანმა განმარტა, თემირლან მაჩალიკაშვილი დაკავებისას ხელყუმბარის ამოქმედებას აპირებდა და უკიდურესი აუცილებლობიდან გამომდინარე ესროლეს. სახელმწიფო უსაფრთხოების სამსახური თემირლან მაჩალიკაშვილს და სპეცოპერაციის შედეგად დაკავებულებს ახმედ ჩატაევისა და მისი თანამზრახველების ხელშეწყობაში ადანაშაულებს.

მაჩალიკაშვილის დაჭრის ფაქტზე პროკურატურამ გამოძიება დაიწყო, მაგრამ გამოძიების მიმდინარეობის და შედეგების შესახებ უწყებას ინფორმაცია ამ დრომდე არ გაუვრცელებია.