თურქული სააგენტოს მიერ გავრცელებული ინფორმაციით, ცნობილმა ჩეჩენმა მეთაურმა მუსლიმ ალ-შიშანმა, რომელიც სამი წლის განმავლობაში სირიაში იმყოფებოდა და ასადის რეჟიმის წინააღმდეგ ბევრ ოპერაციაში მონაწილეობდა, გადაწყვიტა თურქეთის შეიარაღებული ძალების მიერ დაწყებულ ოპერაციაში „ზეთისხილის რტო“ მიიღოს მონაწილეობა. თურქული მედია ასევე წერს, რომ მუსლიმ ალ-შიშანი ჩეჩნეთში რუსულ ოკუპაციას ებრძოდა.

48 წლის მურად მარგოშვილი გროზნოში დაიბადა და რუსეთის მოქალაქეა. ის საქართველომ ტერორისტთა სიაში გასული წლის აგვისტოში შეიყვანა. მარგოშვილი ასოცირებულია ალ-ნუსრას ფრონტთან (Jabhat al-Nusrah), რომელიც ალ-ქაიდას მოკავშირე ექსტრემისტული დაჯგუფებაა და სირიისა და ლიბანის ტერიტორიაზე მოქმედებს.

2012 წელს მურად მარგოშვილმა სირიაში ჩამოაყალიბა დაჯგუფება „ჯუნუდ ალ-შამი“ (სირიის ჯარისკაცები), რომელშიც ყოფილი საბჭოთა ქვეყნებიდან და გერმანიიდან წასული მებრძოლები შედიოდნენ და სხვა დაჯგუფებებთან, ძირითადად ალ-ნუსრას ფრონტთან ერთად, სირიის ხელისუფლების წინააღმდეგ იბრძოდნენ.

2014 წელს მურად მარგოშვილი ტერორისტთა სიაში ამერიკის შეერთებულმა შტატებმაც შეიყვანა.

თურქეთმა სირიელი ქურთების წინააღმდეგ ოპერაცია 20 იანვარს დაიწყო. თურქეთის ხელისუფლება სირიელი ქურთების შეიარაღებულ ფორმირებებს ტერორიზმის მხარდაჭერაში ადანაშაულებს.