პოლიციაში უხუცესების დაბარებას წინ უძღოდა პანკისის სოფელ დუისში გამართული შეკრება, რომელსაც დაახლოებით 20 ადამიანი ესწრებოდა და სადაც ხეობაში ჰესების მშენებლობის საკითხი განიხილეს.

„პოლიციაში იმიტომ დაგვიბარეს, რომ ჰესების მშენებლობას მხარს არ ვუჭერთ. ეს საკითხი ნაჩქარევად არ უნდა გადაწყდეს და ხალხი საქმის კურსში უნდა იყოს, თუ რას მოგვიტანს ჰესების აშენება.

პოლიციის დირექტორმა გვითხრა, რომ ჰესის აშენება გადაწყვეტილია, რომ ეს არის სტრატეგიული სახელმწიფო ობიექტი და ხალხი გაგებით და სერიოზულად უნდა მოეკიდოს, რათა დაპირისპირება არ მოხდეს.

ალბათ გულისხმობდა ადგილობრივებსა და ინვესტორებს შორის დაპირისპირებას“, - უთხრა ვანია მუთოშვილმა პანკისის სათემო რადოს.

არასამთავრობო ორგანიზაცია „ადამიანის უფლებების სწავლებისა და მონიტორინგის ცენტრმა“ (EMC), რომელიც ჰესების მშენებლობის მოწინააღმდეგეთა ინტერესებს იცავს სასამართლოში, შინაგან საქმეთა სამინისტროს მოუწოდა, განმარტოს, რა სამართლებრივი საფუძვლით და წესით იბარებს ადგილობრივებს და რა საფუძვლით ცდილობს ჰესების მშენებლობისთვის მათი მხარდაჭერის მოპოვებას.

ამასთან, EMC ითხოვს, შსს-მ დაუყოვნებლივ შეწყვიტოს პანკისის ხეობის მოსახლეობის დაშინებისა და მათი გამოხატვის თავისუფლების შეზღუდვის პრაქტიკა და საკუთარი საქმიანობა კანონის მოთხოვნებში მოაქციოს; ასევე, დაიწყოს დისციპლინური დევნა ყველა იმ გადაწყვეტილების მიღებაზე პასუხისმგებელი თანამშრომლების მიმართ, რომელიც ადგილობრივი თემის თვითნებური შევიწროების და კონტროლის პროცესშია ჩართული.

შინაგან საქმეთა სამინისტროს ამ საკითხზე რაიმე განმარტება არ გაუკეთებია.

პანკისის მოსახლეობის ნაწილი სოფელ ბირკიანში 5.4 მგვტ დადგმული სიმძლავრის ჰიდროელექტროსადგურის, „ხადორი 3“-ის მშენებლობას თითქმის ერთი წელია აპროტესტებს. „ხადორი 3“-ის მშენებლობის დასრულება 2019 წლის დეკემბრამდეა დაგეგმილი, თუმცა სამუშაოები რამდენიმე თვეა შეჩერებულია. ეს პანკისის ხეობაში მესამე ჰესი იქნება. მისთვის წყლის მიწოდება „ხადორი 2“-ის გამყვანი არხიდან მოხდება, რაც იმას ნიშნავს, რომ ბირკიანს ზემოთ ხადორამდე, დაახლოებით 4.5 კილომეტრზე, მდინარე ალაზანს მილსადენში მოაქცევენ. მდინარის კალაპოტში ალაზნის წყალი თითქმის აღარ დარჩება.

პანკისის ხეობაში დაგეგმილია კიდევ ერთი, 26.28 მვტ სიმძლავრის ჰიდროელექტროსადგურის მშენებლობა მდინარე სამყურისწყალზე. ეს საკითხი სასამართლოშია გასაჩივრებული. ადგილობრივი მცხოვრებლების ნაწილი ჰესის მშენებლობის ნებართვის გაუქმებას ითხოვს. პანკისში მეოთხე ჰესის - „სამყურისწყალი 2“-ის მშენებლობის შემთხვევაში შესაძლოა დასახლებული პუნქტის გავლით მაღალი ძაბვის ახალი ხაზი აშენდეს, რათა ჰესიდან ელექტროენერგია ახმეტის ქვესადგურს მიეწოდოს.