„პანკისში მაჩალიკაშვილის მკვლელობამ დაადასტურა, რომ უშიშროების სამსახური თვითონ გადაიქცა ტერორისტულ ორგანიზაციად და ტერორიზმის ხელშემწყობად.

მოვუწოდებ უშიშროების ხელმძღვანელობას, დაუყოვნებლივ გადადგნენ დაკავებული თანამდებობიდან,“ - განაცხადა შალვა ნათელაშვილმა.

სახელმწიფო უსაფრთხოების სამსახურმა პანკისის ხეობასა და თბილისში კონტრტერორისტული ოპერაცია 26 დეკემბერს ჩაატარა, რის შედეგადაც დაკავებული იქნა ოთხი პირი - რუსლან ალდამოვი, ბადურ ჩოფანაშვილი, რამაზ მარგოშვილი და ზურაბ გორნაკაშვილი, ხოლო 19 წლის თემირლან მაჩალიკაშვილი სპეცოპერაციის დროს სპეცრაზმა თავში სასიკვდილოდ დაჭრა. მაჩალიკაშვილი 10 იანვარს რეანიმაციაში გარდაიცვალა.

უსაფრთხოების სამსახურის განცხადებით, მაჩალიკაშვილი და დაკავებული ოთხი პირი, 22 ნოემბერს, თბილისში, ბერი გაბრიელ სალოსის ქუჩაზე ჩატარებული სპეცოპერაციისას განეიტრალებულ ახმედ ჩატაევს და მისი ჯგუფის წევრებს ეხმარებოდნენ. სახელმწიფო უსაფრთხოების სამსახურმა გაავრცელა ვიდეომასალა, საიდანაც ჩანს, რომ მაჩალიკაშვილი ახმედ ჩატაევის ჯგუფის წევრებთან შოაიფ ბორზიევთან და ასლანბეგ სოლტახმადოვთან ერთად, თბილისში მდებარე ტელეფონების ერთ-ერთ მაღაზიაში შედის. ადვოკატების განცხადებით, აღნიშნული ვიდეოდან გარდა იმისა, რომ თემირლან მაჩალიკაშვილი მათ იცნობდა, არაფერი მტკიცდება. ადვოკატ მარიამ კუბლაშვილის თქმით, აღნიშნული პირები 2016 – 2017 წლებში პანკისის ხეობაში ხშირად იმყოფებოდნენ და მათ სეიფულას და აბდულას სახელით იცნობდნენ.

ტერორიზმის ხელშეწყობის ბრალდებით 9 იანვარს, ახმეტაში კიდევ ერთი პირი, პანკისის მკვიდრი ზურაბ იდოიძე დააკავეს. ხუთივე დაკავებულს სასამართლომ პატიმრობა შეუფარდა.