პანკისში სპეცოპერაციის დროს 19 წლის თემირლან მაჩალიკაშვილის დაჭრის ფაქტზე მთავარმა პროკურატურამ გამოძიება დაიწყო. როგორც პანკისის სათემო რადიოს პროკურატურის საზოგადოებასთან ურთიერთობის დეპარტამენტის უფროსმა ნათია სუხიაშვილმა განუცხადა, გამოძიება სისხლის სამართლის კოდექსის 333-ე მუხლის მე-3 ნაწილით დაიწყო, რაც ძალადობით სამსახურებრივი უფლებამოსილების შესაძლო გადამეტებას გულისხმობს.

სამ საათზე მეტხანს გაგრძელდა თელავის რეფერალურ საავადმყოფოში პანკისში სპეცოპერაციის დროს დაჭრილი 19 წლის თემირლან მაჩალიკაშვილის ოპერაცია. მაჩალიკაშვილს თავის არეში შემავალი ჭრილობა აქვს. ოპერაცია თბილისიდან მოწვეულმა ნეიროქირურგებმა ჩაატარეს. ექიმების თქმით, პაციენტის ჯანმრთელობის მდგომარეობა მძიმეა. თემირლან მაჩალიკაშვილი რეანიმაციაშია მოთავსებული.

საქართველოს სახალხო დამცველი ნინო ლომჯარია ეხმიანება პანკისში ჩატარებული სპეცოპერაციის დროს 19 წლის თემირლან მაჩალიკაშვილი დაიჭრის ფაქტს და მოუწოდებს საქართველოს მთავარ პროკურატურას, ოპერატიულად გამოიძიოს აღნიშნული შემთხვევა, დაადგინოს, ხომ არ ჰქონდა ადგილი სამართალდამცველთა მხრიდან ძალის შესაძლო გადამეტებას.

ახალი ამბების გამოშვებას ნაზი დაქიშვილი უძღვება.

პანკისის ხეობაში ჩატარებული სპეცოპერაციის დროს, სპეცრაზმელების მიერ დაჭრილი 19 წლის თემირლან მაჩალიკაშვილის ოჯახი უარყოფს სახელმწიფო უსაფრთხოების სამსახურის მიერ გავრცელებულ ინფორმაციას იმასთან დაკავშირებით, რომ ბიჭმა სამართალდამცავებს წინააღმდეგობა გაუწია და ხელყუმბარის ამოქმედებას ცდილობდა.

სახელმწიფო უსაფრთხოების სამსახურის კონტრტერორისტული დეპარტამენტის ინფორმაციით, დღეს დილით თბილისსა და ახმეტის რაიონის სოფლებში, დუისსა და ომალოში დაკავებულ იქნა საქართველოს 5 მოქალაქე: ზურაბ გორნაკაშვილი, რუსლან ალდამოვი, რამაზ მარგოშვილი, ბადურ ჩოფანაშვილი და თემირლან მაჩალიკაშვილი.

პანკისის ხეობაში, სოფელ დუისში სპეცოპერაციის დროს დაჭრილი 19 წლის თემირლან მაჩალიკაშვილის ჯანმრთელობის მდგომარეობა მძიმეა. ის თელავის რეფერალურ საავადმყოფოს რეანიმაციულ განყოფილებაშია მოთავსებული და კომპიუტერული კვლევა უტარდება. ექიმების ინფორმაციით, მაჩალიკაშვილს ჭრილობა თავის არეში ცეცხლსასროლი იარაღით აქვს მიყენებული.

პანკისის ხეობის სოფელ დუისში გვიან ღამით ჩატარებული სპეცოპერაციის შედეგად, მაჩალიკაშვილების სახლში ახალგაზრდა დაიჭრა. ოჯახის წევრების განცხადებით, დაჭრილი 19 წლის თემირლან მაჩალიკაშვილია, რომელიც სამართალდამცავებმა დააკავეს. დაჭრილის ჯანმრთელობის მდგომარეობა უცნობია. კატასტროფის ბრიგადამ ის თელავის რეფერალურ საავადმყოფოში გვიან ღამით გადაიყვანა.