შინაგან საქმეთა სამინისტრო ახმეტის მუნიციპალიტეტში, პანკისის ხეობის სოფელ ძიბახევში, ზუსტად იმ ადგილას, სადაც 2019 წლის 21 აპრილს, პოლიციასა და ადგილობრივ მოსახლეობას შორის შეტაკება მოხდა, 200 თანამშრომელზე გათვლილ პოლიციის ახალ შენობას აშენებს. მშენებარე ობიექტი ახმეტის რაიონული სამმართველოს შენობაზე ორჯერ დიდია.

პანკისელი ახალგაზრდები თბილისში, საქართველოს კათოლიკოს-პატრიარქს ილია მეორეს და შერიგებისა და სამოქალაქო თანასწორობის საკითხებში სახელმწიფო მინისტრს, ქეთევან ციხელაშვილს შეხვდნენ. პატრიარქთან შეხვედრა საპატრიარქოში გაიმართა, მინისტრთან კი მთავარობის კანცელარიაში.

„რა თქმა უნდა, პანკისის მოსახლეობას შევხვდები და ვისაუბრებთ ყველა იმ საკითხზე, რაც მოსახლეობისთვის აქტუალურია. მათ შორის იმაზეც, თუ რა საქმიანობაა დაგეგმილი მომავალში ხეობის განვითარებისთვის“, - განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა, პანკისის სახალხო კრების მიმართვაზე საპასუხოდ.

პანკისის სახალხო კრება, რომელიც პანკისელი უხუცესებისა და ახალგაზრდების გაერთიანებაა, მიმართავს ხელისუფლებას, საზოგადოებას, დიპლომატიურ კორპუსსა და საზოგადოებრივ ორგანიზაციებს, რათა მონაწილეობა მიიღონ 21 აპრილს, პანკისის ხეობაში შექმნილი კრიზისის დაძლევაში. პანკისის სათემო რადიო მიმართვას უცვლელად გთავაზობთ.

თამაზ ბაღაკაშვილი პანკისის სახალხო კრების ერთ-ერთი ლიდერია. წლების განმავლობაში ის ხეობაში „ქართული ოცნების“ კოორდინატორი იყო. 21 აპრილს, პანკისში, სამართალდამცავებსა და მოსახლეობას შორის მომხდარი შეტაკებისას, მთავრობის წევრებთან მოლაპარაკების პროცესში აქტიურად მონაწილეობდა. „თუ დაიწყო ერთი კაცის აყვანაც, მე ვფიქრობ, მთელი ხალხი ეყოლებათ ასაყვანი იმიტომ, რომ ვინც მაშინ პანკისის ხეობაში იმყოფებოდა, ახალგაზრდობის 90%-ი მონაწილეობდა ამ არეულობაში. არ არსებობს ახალგაზრდა, ან ქვა არ აეღო ან ჯოხი“, - ამბობს თამაზ ბაღაკაშვილი შს მინისტრის განცხადებაზე კომენტირებისას. მინისტრმა გახარიამ თქვა, რომ ყველა, ვინც იძალადა შსს-ს თანამშრომლებზე, პასუხს აგებს.

„მე პირველ ომში აქ არ ვიყავი, შვილიშვილი მყავდა ავად. მეორე ომში მოვედი. დიდიან-პატარიანად ყველა აქ იყო, მე რა დამტოვებდა სხვაგან? არ დავრჩებოდი. ჩვენ, ქისტები ერთი მუჭა ხალხი ვართ. ამდენ სპეცრაზმს აქ რა უნდოდა, უფროსი არა ჰყავდათ მაგათ? 18 წლის ბავშვი დაცხრილეს, სახლში, თავის საწოლში ტყვია შუბლში დაახალეს და წავიდნენ. რა უფლებით შემოვიდა სპეცრაზმი? იმდენი ჯარი რატომ შემოიყვანა გახარიამ?“- სოფელ ძიბახევში მცხოვრები ძანო მაჩალიკაშვილი, პანკისში, 2019 წლის 21 აპრილს, სამართალდამცავებსა და ადგილობრივ მოსახლეობას შორის მომხდარ შეტაკებას იხსენებს.

პანკისში, სამართალდამცავებსა და აქციის მონაწილეებს შორის, 21 აპრილს მომხდარი შეტაკების შედეგად სამედიცინო დახმარების გაწევა 55 ადამიანს დასჭირდა, მათ შორის 38 პოლიციელს და 17 მოქალაქეს. თელავის რეფერალურ საავადმყოფოშია მოთავსებული შსს-ს 15 თანამშრომელი.