ახმეტის ყოფილი გამგებლის სამსახურებრივ სარგებლობაში არსებული მაღალი გამავლობის ავტომანქანა „Nissan Pathfainder“ 2016 წლის თებერვალში ჩატარებული ტენდერის საშუალებით 27 700 ლარად იქნა შეძენილი. 

ბექა ბაიდაური აღნიშნული ავტომანქანით უფლებამოსილების შეწყვეტამდე - 11 ნოემბრამდე სარგებლობდა, 2017 წლის ოქტომბერში ჩატარებული ადგილობრივი თვითმმართველობის არჩევნების შედეგად არჩეული მერი უფლებამოსილების განხორციელებას 12 ნოემბრიდან შეუდგა. 

პანკისის სათემო რადიოს მიერ მოპოვებული ინფორმაციით, სამსახურებრივი ავტომანქანის ძრავი გადახურების შედეგად სრულად არის მწყობრიდან გამოსული, ახალი ძრავის შესაძენად კი 1800 აშშ დოლარი, ანუ დაახლოებით 4700 ლარია საჭირო. ამის გამო, ახმეტის მერი ერთ-ერთი ყოფილი მოადგილის სამსახურებრივი ავტომანქანით სარგებლობს. 

საინფორმაციო ცენტრების ქსელი წერდა, რომ ახმეტის გამგეობის თანამდებობის პირების ავტომანქანების რემონტზე 2017 წლის აგვისტოში ბიუჯეტიდან 8 000 ლარი დაიხარჯა, ხოლო სექტემბერში გამოცხადებული ტენდერით - კიდევ 10 000 ლარი. თანამდებობის პირების უმრავლესობა სამსახურებრივ ავტომანქანებს სისტემატურად იყენებს პირადი მიზნებისათვის, მათ შორის, დასვენებისა და უქმე დღეებში, ასევე შვებულებაში ყოფნის პერიოდში.