პარლამენტის საზოგადოებასთან ურთიერთობის დეპარტამენტის ინფორმაციით, სამუშაო შეხვედრაზე, რომელზეც პანკისში დაგემილი პროექტების მიმდინარეობასა და ადგილობრივი ბიუჯეტის პრიორიტეტებს განიხილავდნენ, საუბარი ხეობაში ჩატარებულ ანტიტერორისტულ სპეცოპერაციას შეეხო.

დეპუტატის განმარტებით, „ეს იყო კონკრეტული დანაშაულის პრევენცია, რომლის გაიგივება ქისტ ხალხთან დაუშვებელია. ერთმანეთისგან მკვეთრად უნდა გაიმიჯნოს ეროვნება და ტერორიზმი, რომელიც ნებისმიერ შემთხვევაში მკაცრად დასჯადია. ამ ეტაპზე, აუცილებელია შევინარჩუნოთ სიმშვიდე და დაველოდოთ გამოძიების შედეგებს. საქმის დაჩქარებული გამოძიება სახელმწიფოსა და თავად ამ საქმეში ჩართული ყველა უწყების ინტერესებში შედის“.

მისივე თქმით, ხელისუფლებამ და მოსახლეობამ ერთად, ურთიერთთანამშრომლობით ხეობაში უნდა შექმნან ცხოვრების ისეთი პირობები, რომ აქტიურ საზოგადოებრივ ცხოვრებაში რაც შეიძლება მეტი ახალგაზრდა ჩაერთოს.

შეხვედრაზე აღინიშნა, რომ გაგრძელდება ხეობაში მიმდინარე ინფრასტრუქტურული პროექტები, მოგვარდება გზების მოწესრიგებასთან და წყლით უზრუნველყოფასთან დაკავშირებული საკითხები. მომდევნო შეხვედრა პანკისის ხეობაში მცხოვრებ ახალგაზრდა თაობის წარმომადგენლებთან გაიმართება.

სახელმწიფო უსაფრთხოების სამსახურმა 26 დეკემბერს პანკისის ხეობაში ჩატარებული სპეცოპერაციის შედეგად 5 პირი დააკავა. მათ შორის ერთ-ერთი, 19 წლის თემირლან მაჩალიკაშვილი სპეცრაზმმა თავის არეში დაჭრა. მისი ჯანმრთელობის მდგომარეობა უკიდურესად მძიმეა. დაკავებულებიდან ოთხს სასამართლომ პატიმრობა შეუფარდა. მათ ბრალად ტერორიზმის ხელშეწყობა, კერძოდ, ახმედ ჩატაევის და მისი ჯგუფისთვის დახმარების გაწევა ედებათ.