სახელმწიფო შესყიდვებთან დაკავშირებული დავების განმხილველმა საბჭომ, თუშეთში, დართლო-ჩიღოს საავტომობილო გზის მშენებლობის გამო გამოცხადებულ ტენდერთან დაკავშირებით, სრულად დააკმაყოფილა შპს „თბილისის მუდმივმოქმედი არბიტრაჟის“ საჩივარი და კანონთან შეუსაბამობის მოტივით გააუქმა ახმეტის გამგეობის სატენდერო კომისიის შემაჯამებელი გადაწყვეტილებები.

მაყვლის, ჟოლოსა და კომშის კულტურების გასაშენებლად სახელმწიფო ფერმერებს ნერგების ღირებულების 70%-ს და წვეთოვანი სარწყავი სისტემების მოწყობის ღირებულების 50%-ს დაუფინანსებს. შესაბამისი ცვლილება შევიდა პროექტში „დანერგე მომავალი“, რომელიც საქართველოს მასშტაბით მრავალწლოვანი კულტურების გაშენებას ითვალისწინებს.

საქართველოში ბიზნესის ხელშეწყობისთვის ახალი პროექტი „სტარტაპ მეგობრული“ დაიწყო, რომელი დამწყები ბიზნესის ხელშეწყობის პროგრამა „სტარტაპ საქართველოს“ გაგრძელებაა. „სტარტაპ მეგობრული“ სტარტაპებს მსხვილ ბიზნესკომპანიებთან ურთიერთობის დამყარებაში დაეხმარება, ხოლო მსხვილი ბიზნესის წარმომადგენლებს, სხვადასხვა დარგის განვითარების პროცესში ჩართვისა და ორმხრივად სასარგებლო ინვესტიციების განხორციელების საშუალებას მისცემს.

ეკონომიკისა და მდგრადი განვითარების მინისტრის დიმიტრი ქუმსიშვილის განცხადებით, ინტერნეტთან წვდომა როგორც დედაქალაქში, ისე რეგიონებში თანაბრად უნდა იყოს შესაძლებელი. ქუმსიშვილის თქმით, 2-3 წელიწადში ინტერნეტის პრობლემა საქართველოს ყველა დასახლებულ პუნქტში მოგვარდება.

თუშეთის სოფელ ომალოში აეროდრომის პროექტირება იწყება. ამ საკითხს მთავრობა დღევანდელ სხდომაზე განიხილავს. როგორც საქართველოს პრემიერ-მინისტრმა განაცხადა, შიდა ავიაციის განვითარება ქვეყნის სივრცითი განვითარების ერთ-ერთი მნიშვნელოვანი მიმართულებაა.

საბაჟო გამშვები პუნქტი „ყაზბეგი“ მუშაობას კვლავ 24-საათიან რეჟიმში განაგრძობს. შემოსავლების სამსახურის ინფორმაციით, მდინარე დევდორაკის ხეობაში განვითარებული სტიქიური მოვლენების გამო, საბაჟო პროცედურები 19 ოქტომბრამდე შეზღუდული გრაფიკით ხორციელდებოდა.