ახალი ამბების გამოშვებას ნაზი დაქიშვილი უძღვება.

ახმეტის მუნიციპალიტეტის ახალარჩეული საკრებულოს წევრებმა საკრებულოს თავმჯდომარედ ახმეტა-თელავის მაჟორიტარი დეპუტატის გელა სამხარაულის დეიდაშვილი, თამარ ყეინიშვილი აირჩიეს. საკრებულოს 31 წევრიდან ყეინიშვილს მხარი 21-მა დაუჭირა. იგი წინა მოწვევის საკრებულოს თავმჯდომარედაც მუშაობდა 2017 წლის მარტიდან.

ახმეტის რაიონის სოფელ ბირკიანში მცხოვრებმა 11 წლის ძიუდოისტმა, ირაკლი ქავთარაშვილმა საბერძნეთის დედაქალაქში გამართულ საერთაშორისო ტურნირში მიიღო მონაწილეობა და პირველი ადგილი მოიპოვა. 40 კილოგრამ წონით კატეგორიაში მან ხუთი ორთაბრძოლა ჩაატარა, ფინალში კი გერმანელი მეტოქე დაამარცხა.

ახმეტის მუნიციპალიტეტის საკრებულოს პირველი სხდომა 20 ნოემბერს, 15:00 საათზე გაიმართება. ახმეტის ახალარჩეულ საკრებულოს 31 წევრი ჰყავს, მათგან 16 მაჟორიტარია, 15 კი პროპორციული სისტემით არჩეული.

ახმეტის რაიონში, ილტოს ხეობის სოფელ ჭართალაში 118 მეტრი სიმაღლის და დაახლოებით 200 ჰექტარი ფართობის წყალსაცავი აშენდება. მშენებლობის წინა საპროექტო სამუშაოებისთვის ნახევარ მილიონზე მეტი ლარი უკვე გამოყოფილია, რომელზეც ტენდერი უახლოეს პერიოდში გამოცხდდება.

„ქართულმა ოცნებამ“ მაჟორიტარული არჩევნები ახმეტის სამ სოფელში, კასრისწყალში, ქისტაურსა და ოჟიოში წააგო.

ცენტრალური საარჩევნო კომისიის წინასწარი მონაცემებით, ახმეტის მე-18 სარჩევნო ოლქში „ქართული ოცნება – დემოკრატიული საქართველოს“ მერობის კანდიდატმა იოსებ ქარუმაშვილმა გაიმარჯვა, რომელმაც ამომრჩეველთა ხმების  59.41 % (8 523 ხმა) მიიღო. 29 უბნიდან ყველა უბნის შედეგები დათვლილი და გამოქვეყნებულია.

ახმეტის მე-18 საარჩევნო ოლქის 23-ე ჯოყოლოს საარჩევნო უბანზე ორი დარღვევა დაფიქსირდა. არასამთავრობო ორგანიზაცია „ადამიანის უფლებათა ცენტრის“ დამკვირვებლის, თამარ ლუკავას ინფორმაციით, ერთი საარჩევნო სუბიექტიდან უბანზე ორი წარმომადგენელი იმყოფებოდა. დამკვირვებლის შენიშვნის შემდეგ კომისიის თავმჯდომარემ ერთ-ერთ მათგანს საარჩევნო უბანი დაატოვებინა.

პანკისის ხეობის სოფელ დუისის საჯარო სკოლის XI კლასის მოსწავლე მარიამ მარგოშვილი 2017-2018 სასწავლო წლის "ახმეტის ეტალონი მოსწავლე" გახდა. პროექტ "ეტალონის" ორგანიზებით ინტელექტ-ჩემპიონატი ახმეტაში გაიმართა, სადაც მარიამ მარგოშვილმა 71 ქულა დააგროვა.

18 ოქტომბრის ჩანაწერი (2017 წ.) – 21 ოქტომბრის ადგილობრივი თვითმმართველობის არჩევნებისთვის ახმეტის მუნიციპალიტეტში მერობის 8 კანდიდატია რეგისტრირებული.